Ajit Pawar and Anna Bansode : जिथं अजितदादा तिथं मी; आमदार अण्णा बनसोडेंनी स्पष्टच सांगितलं

Maharashtra Politics : शिंदे-फडणवीस सरकारमधील मंत्री गुलाबराव पाटील यांनी राष्ट्रवादीचे नेते विरोधी पक्षनेते अजित पवार काही आमदारांसह भाजपमध्ये दाखल होणार असल्याच दावा केला. पाटील म्हणाले, "अजित पवार (Ajit Pawar) हीच राष्ट्रवादी आहे. त्यामुळे ते जे बोलतील तोच आमदारांचा आकडा त्यांच्यासोबत असेल. अजित पवारांसोबत बरेच आमदार असून कोणतेही लग्न व्हायचं असेल तर तिथीची गरज असते."

दरम्यान, संजय राऊत यांनीही राष्ट्रवादी फोडण्याचा भाजपचा डाव असल्याचे विधान केले. त्यामुळे राष्ट्रवादी काँग्रेसमध्ये (NCP) फूट पडून अजित पवार भाजपमध्ये दाखल होणार असल्याची चर्चा सुरू झाली आहे. या पार्श्वभूमीवर पिंपरीचे आमदार अण्णा बनसोडे (Anna Bansode) यांनी 'जिथं दादा तिथं मी' असे वक्तव्य केल्याने राजकिय वर्तुळातून अश्चर्य व्यक्त केले जात आहे.

शिंदे-फडणवीस सरकारमधील शिवसेनेच्या १६ आमदारांबाबत उच्च न्यायालयाचा निकाल काही दिवसात येण्याची शक्यता आहे. या पार्श्वभूमीवर राज्यात लवकरच राजकीय भूकंप होण्याची शक्यता काही बड्या नेत्यांनी वर्तविली आहे. सध्याचे उपमुख्यमंत्री देवेंद्र फडणवीस (Devendra Fadnavis) आणि विरोधी पक्षनेते अजित पवार यांचा पहाटेचा शपथविधी सर्वांच्या लक्षात आहे. त्या पार्श्वभूमीवर आता अजित पवार काही आमदारांसह भाजपमधे जाण्याच्या चर्चांना उधाण आले आहे. त्यातच राष्ट्रवादी काँग्रेसचे आमदार बनसोडे यांनीही आपली भूमिका स्पष्ट केली आहे.

आमदार अण्णा बनसोडे (Anna Bansode) म्हणाले की, "राष्ट्रवादी काँग्रेसच्या कार्यकर्त्यांसह राज्यातील सर्वांना माहिती आहे की मी अजितदादांचा कट्टर समर्थक आहे. ते उद्या जो निर्णय घेतील तो मला आजच मान्य आहे. दादा जातील तिकडे जाणार. शेवटपर्यंत मी त्यांच्यासोबत राहणार आहे." दरम्यान, आमदार बनसोडे यांनी पहाटेच्या शपथविधीचा साक्षीदार असल्याचे समाधान व्यक्त केले होते.

पहाटेच्या शपथविधीवरून आमदार बनसोडे म्हणाले होते की, "अजित पवार (Ajit Pawar) आणि देवेंद्र फडणवीस यांच्या पहाटेच्या शपथविधी कार्यक्रम झाला. त्या कार्यक्रमाचा साक्षीदार असल्याचे समाधान आणि अजित पवारांना साथ दिली याचा आनंद आहे. तो शपथविधी राष्ट्रपती राजवट उठवण्यासाठी होता, हे शरद पवार यांनी सांगितले. त्यामुळे मी जे केले ते योग्यच होते."