Mainak Ghosh : सलाम...!!! वडिलांचे अत्यंविधी करून धाराशिवचे CEO पुरग्रस्तांच्या मदतीसाठी शेतकऱ्यांच्या बांधावर

Dharashiv News, 30 Sep : सरकारी अधिकाऱ्यांची सर्वसामान्य नागरिकांच्या मनात एक वेगळीच प्रतिमा अलिकडच्या काही दिवसांत निर्माण झाली आहे. सततच्या येणाऱ्या भ्रष्टाचाराच्या आणि पदाचा गैरवापर केल्याच्या बातम्यांमुळे सरकारी अधिकाऱ्यांची प्रतिमा मलिन झाल्याचं पाहायला मिळत आहे.

अशातच नुकतंच संपूर्ण मराठवाडा पुराच्या पाण्यात असताना लोकांची घरे वाहून गेल्याने कित्येक जण रस्त्यावर आले, शेतकरी संकटात सापडलेला असताना धाराशिवचे जिल्हाधिकारी कीर्ती किरण पुजार यांनी एका सांस्कृतिक महोत्सवात डान्स केल्याचं प्रकरण समोर आलं.

या कृत्यामुळे त्यांच्यावर चोहोबाजूंनी टीका केली गेली. त्यामुळे या अधिकार्‍यांमध्ये संवेदनशीलता आहे की नाही? असा प्रश्न उपस्थित केला जात असतानाच आता एका सरकारी कर्मचाऱ्याने केलेल्या कामाचे राज्यभरातून कौतुक केलं जात आहे.

धाराशिव जिल्हा परिषदेचे मुख्य कार्यकारी अधिकारी असलेले डॉ. मैनक घोष यांच्या वडिलांचे नुकतंच निधन झालं. मात्र, वडिलांच्या निधनाचं दु:ख बाजूला सारून धाराशिवमधील पुराचे गांभीर्य लक्षात घेत घोष हे वडिलांच्या निधनाच्या दुसऱ्याच दिवशी शेतकऱ्यांच्या बांधावर अतिवृष्टीचा आढावा घेण्यासाठी गेले.

त्यामुळे मनात वडिलांच्या निधनाचं दु:ख असतानाही आपल्या कर्तव्याला प्राधान्य देणाऱ्या संवेदनशील सीईओ मैनक घोष यांचं कौतुक केलं जात आहे. शिवाय त्यांच्या या कृत्यामुळे पुराच्या पाण्यात लोक मरत असताना सार्वजनिक कार्यक्रमात नाचणारे जिल्हाधिकारी कुठे आणि वडिलांच्या निधनाच्या दुसऱ्याच दिवशी शेतकऱ्यांच्या नुकसानीचा आढावा घेणारे कर्तव्यदक्ष मैनक घोष कुठे? अशी तुलना नागरिकांकडून केली जात आहे.

मिळालेल्या माहितीनुसार मूळचे पश्चिम बंगालचे असणारे घाराशिव जिल्हा परिषदेचे मुख्य कार्यकारी अधिकारी डॉ. मैनक घोष यांच्या वडिलांचे 27 सप्टेंबर रोजी निधन झालं. त्यांनंतर त्यांनी वडिलांचे अंत्यसंस्कार केले आणि दुसऱ्याच दिवशी त्यांनी अतिवृष्टी झालेल्या भागाची पाहणी करत पूरस्थितीचा आढावा घेतला. त्यामुळे डॉ. घोष यांच्यावर कौतुकाचा वर्षाव केला जात आहे.