Police Recruitment : पोलीस भरतीसाठी वयात तीन वर्षांची सवलत; मुख्यमंत्र्यांचा मोठा निर्णय, निवडणुकीआधी 'यूपी'त धमाका

Recruitment News : महाराष्ट्र लोकसेवा आयोगाच्या कंबाईन ग्रुप बी संयुक्त पूर्व परीक्षेची तयार करणाऱ्या शेकडो विद्यार्थ्यांनी पुण्यात मागील आठवड्यात आंदोलन केले. परीक्षेची जाहिरात उशिरा आल्याने वयोमर्यादा वाढविण्याची या विद्यार्थ्यांची मागणी होती. त्यासाठी विरोधकांनी जोर लावला होता. पण ना राज्य सरकार, ना आयोगाने या मागणीचा विचार केला. रविवारी ही परीक्षा पार पडली. विद्यार्थ्यांचे आंदोलन व्यर्थ ठरले.

महाराष्ट्राप्रमाणेच भाजपची सत्ता असलेल्या उत्तर प्रदेशातही पोलीस भरतीसाठी वयोमर्यादा वाढविण्याच्या मागणीने जोर धरला होता. प्रमुख विरोधी पक्ष असलेल्या समाजवादी पक्षासह अन्य विरोधी पक्षांनीही विद्यार्थ्यांच्या मागे उभे राहत मुख्यमंत्री योगी आदित्यनाथ यांच्याकडे वय वाढविण्याची मागणी केली जात होती. अखेर योगींनीही ही मागणी मान्य केली आहे.

उत्तर प्रदेश सरकारकडून वयोमर्यादेत थेट वर्षांच्या सवलतीची मोठी घोषणा केली आहे. राज्यात सुरू असलेल्या ३२ हजार ६७९ पदांसाठीच्या पोलीस भरतीसाठी ही सवलत असणार आहे. त्यामुळे हजारो युवक या भरतीसाठी आता पात्र ठरणार आहेत. ही भरती प्रक्रिया थेट होणार आहे. त्यामुळे या युवकांना याचा मोठा फायदा होणार आहे.

सरकारने सर्व प्रवर्गांसाठी वयोमर्यादेत सवलत दिली आहे. यूपी सरकारने याबाबतचा आदेश जारी केला आहे. समाजवादी पक्षाचे अध्यक्ष खासदार अखिलेश यादव यांच्यासह भाजप आमदारांनीही मुख्यमंत्र्यांना पत्र लिहून वयोमर्यादेत सवलत देण्याची मागणी केली होती.

उत्तर प्रदेशात पुढील वर्षी विधानसभेची निवडणूक होणार आहे. त्यासाठी सत्ताधारी भाजपकडून विविध पदांच्या भरती प्रक्रियेची जय्यत तयारी केली जात आहे. यापार्श्वभूमीवर पोलीस भरतीही होत आहे. त्यातच आता वयोमर्यादा वाढवत योगींनी हजारो युवकांची मागणी मान्य केली आहे. निवडणुकीच्या पार्श्वभूमीवर हा निर्णय महत्वाचा मानला जात आहे.