Maharashtra New DGP: मोदी सरकारच्या समितीकडून 'ग्रीन सिग्नल'; महाराष्ट्राशी खास कनेक्शन असणारा डॅशिंग अधिकारी लवकरच होणार 'DGP'

New Delhi News: राष्ट्रीय तपास यंत्रणेचे (एनआयए) प्रमुख असलेले सदानंद दाते लवकरच महाराष्ट्राचे पोलिस महासंचालक म्हणून पदभार स्वीकारण्याची शक्यता आहे. पंतप्रधान नरेंद्र मोदी यांच्या अध्यक्षतेखालील मंत्रिमंडळाच्या नियुक्ती समितीने सदानंद दाते यांना महाराष्ट्र केडरमध्ये परतण्यास मंजुरी दिल्याने महाराष्ट्राच्या पोलिस महासंचालकपदी त्यांची नेमणूक निश्चित मानली जात आहे.

गृह मंत्रालयाच्या प्रस्तावास मंजुरी देत सदानंद दाते यांची मुदतीपूर्व प्रतिनियुक्ती समाप्त करण्यात येत असून, त्यांना त्यांच्या मूळ कॅडरमध्ये परत पाठवले जात असल्याचे केंद्र सरकारकडून जारी करण्यात आलेल्या आदेशात म्हटले आहे. दाते यांना राज्यात परत पाठवण्याची विनंती महाराष्ट्र सरकारने गृह मंत्रालयाला केली होती.

भारतीय पोलिस सेवेचे १९९० च्या तुकडीचे अधिकारी असलेल्या सदानंद दाते यांनी मुंबईतील २६/११ च्या दहशतवादी हल्ल्याचा मुकाबला करण्यात निर्णायक भूमिका बजावली होती. तसेच पुलवामामधील दहशतवादी हल्ल्यांच्या तपासाचे नेतृत्वही त्यांच्याकडे होते. एक एप्रिल २०२४ रोजी, दाते यांची ‘एनआयए’च्या महासंचालकपदी नियुक्ती झाली होती. तत्पूर्वी ते महाराष्ट्र पोलिसांच्या दहशतवाद विरोधी पथकाचे (एटीएस) प्रमुख, मुंबईतील सहपोलिस आयुक्त (गुन्हे) यासह अनेक महत्त्वाची पदे भूषवली आहेत.

केंद्रात प्रतिनियुक्तीवर गेल्यानंतर त्यांनी केंद्रीय राखीव पोलिस दल आणि कायदा आणि न्याय विभागात संयुक्त सचिव म्हणूनही काम केले होते. विद्यमान पोलिस महासंचालक रश्मी शुक्ला तीन जानेवारी २०२६ ला निवृत्त होणार आहेत. त्यांच्या जागेवर सदानंद दाते यांची नियुक्ती अपेक्षित आहे. राज्याचे पोलिस प्रमुख म्हणून त्यांना डिसेंबर २०२७ पर्यंतचा दोन वर्षांचा कार्यकाळ दिला जाऊ शकतो, असेही सांगितले जात आहे.