Ajit Pawar Pune Guardian minister : ...अखेर पुण्याचे 'दादा' अजित पवारच ठरले; पालकमंत्रिपद भाजप ऐवजी राष्ट्रवादीकडेच!

Guardian Minister Pune News : राज्यामध्ये महायुतीचे सरकार आल्यानंतर ज्या पद्धतीने मुख्यमंत्री कोण होणार याबाबतच्या मोठा चर्चा रंगल्या होत्या. त्याच पद्धतीने आता पुण्याचा पालकमंत्री पद हे भाजपकडे राहणार की? ते पुन्हा राष्ट्रवादीला मिळणार या याबाबत दावे प्रतिदावे करण्यात येत होते. मात्र अखेर पुण्याचे पालकमंत्री पुन्हा एकदा अजित पवारच राहणार यावर शिक्कामोर्तब झाला असून अजित पवारांकडे पुण्यासह बीडच्या पालकमंत्री पदाची जबाबदारी सोपवण्यात अली आहे.

अनेक दिवसापासून प्रतीक्षेत असलेला पालकमंत्री पदाचा तिढा आता सुटला असून आज मुख्यमंत्री देवेंद्र फडणवीस यांनी पालकमंत्री पदाचे वाटप केला आहे. पुणे जिल्ह्याच्या पालकमंत्री पदासाठी एकीकडे राष्ट्रवादी काँग्रेसकडून उपमुख्यमंत्री अजित पवार(Ajit pawar) तर दुसरीकडे भाजपाकडून कॅबिनेट मंत्री चंद्रकांत पाटील हे पालकमंत्री पदासाठी दावेदार होते. मात्र चंद्रकांत पाटील यांना सांगलीचे पालकमंत्री पद देत पुण्याचा तिढा मुख्यमंत्री देवेंद्र फडणवीस यांनी सोडवला आहे.

राज्यात महायुतीचे सरकार स्थापन झाल्यानंतर जिल्ह्यात भाजपाचे(BJP) आमदारांची संख्या जास्त असल्याने पालकमंत्री पद भाजपाला मिळणार असा विश्वास भाजपचे स्थानिक नेते व्यक्त करत होते. तर दुसरीकडे अजित पवारांशिवाय पुण्याचं पालकमंत्री पद कोणाकडे जाऊ शकत नाही, असं ठाम मत राष्ट्रवादी काँग्रेसचे स्थानिक नेते व्यक्त करत होते.

त्यामुळे पुण्याच्या पालकमंत्री पदाबाबत मुख्यमंत्री देवेंद्र फडणवीस(Devendra Fadnavis) काय निर्णय घेणार याकडे सर्वांचे लक्ष लागले होते. पुण्याचा पालकमंत्री पद राखण्यात राष्ट्रवादीला आणि अनुषंगाने अजित पवारांना यश आला आहे.

सरपंच संतोष देशमुख यांच्या हत्येनंतर मंत्री धनंजय मुंडे(Dhananjay Munde) यांचा राजीनामा घेण्याची मागणी सातत्याने जोर धरत आहे. या पार्श्वभूमीवर धनंजय मुंडे यांच्याकडे बीडचे पालकमंत्री पद येणार का? याकडे सर्वांचेच लक्ष लागले होते. तसेच मुख्यमंत्री देवेंद्र फडणवीस यांनी बीडचे पालकमंत्री पद स्वीकारावे अशी देखील मागणी होत होती. मात्र अजित पवार यांनी बीडचे पालकमंत्री पद देखील स्वतःकडेच ठेवणे पसंत केले आहे.

(Edited by - Mayur Ratnaparkhe)