Ajit Pawar BJP criticism: शरद पवारांचा फोटो बॅनरवर पुढेही कायम राहणार का? अजित पवारांचं एका वाक्यात सूचक उत्तर

Pune News: महापालिका निवडणुकीच्या पार्श्वभूमीवर उपमुख्यमंत्री अजित पवार यांची पत्रकार परिषद शुक्रवारी पिंपरी चिंचवड येथे शुक्रवारी सायंकाळी पार पडली. या पत्रकार परिषदेत अजितदादांनी पहिल्यांदाच भाजपच्या कारभारावर जोरदार टीका केली. भाजपच्या कार्यकाळात पिंपरी चिंचवड महापालिका कर्जबाजारी झाल्याचा आरोप त्यांनी केला. याच पत्रकार परिषदेत राष्ट्रवादीच्या माध्यमातून शरद पवार यांनी विकास कामे केल्याचे त्यांनी सांगितले. तर शरद पवारांचा फोटो बॅनरवर पुढेही कायम राहणार का? यावर अजित दादांनी सूचक विधान केले.

आगामी काळात होत असलेल्या महापालिका निवडणुकीनंतरही शरद पवारांचा फोटो बॅनरवर पुढेही कायम राहणार का? असा सवाल भर पत्रकार परिषदेत उपमुख्यमंत्री अजित पवार (Ajit Pawar) यांना विचारण्यात आला होता. त्यावर अजितदादांनी यावर एका क्षणाचा विलंब न करता तुमच्या तोंडात साखर पडो, असे एका वाक्यात सूचक उत्तर दिले. त्यामुळे चर्चेला उधाण आले आहे.

अजितदादांच्या या वक्तव्यानंतर भविष्यकाळात दोन्ही राष्ट्रवादी काँग्रेस एकत्र येतील, अशी चर्चा राजकीय वर्तुळात रंगली आहे. त्यांनी दिलेल्या या उत्तरामुळे पुन्हा एकदा आता दोन्ही राष्ट्रवादी भविष्यात एकत्र येणार का? अशा चर्चा पुन्हा एकदा सुरु झाल्या आहेत.

महापालिका निवडणुकीसाठी दोन्ही राष्ट्रवादी काँग्रेसनी (NCP) पिंपरी-चिंचवड पाठोपाठ पुण्यातही एकत्रच निवडणूक लढवण्याचा निर्णय घेतला आहे. या पार्श्वभूमीवर अजित पवार आणि शरद पवारांच्या राष्ट्रवादीची लढाई ही आता थेट भाजपच्या विरोधात असणार असल्याचे मोठं वक्तव्य केले आहे. त्यामुळे राज्यात महायुतीसोबत असलेल्या अजित पवारांची राष्ट्रवादी पुण्यात मात्र मित्रपक्ष भाजप विरोधातच शड्डू ठोकणार असल्याचे दिसते .

महानगरपालिका निवडणुकीच्या निमित्ताने अजितदादांनी भाजपवर जोरदार हल्लाबोल केला आहे. भाजपच्या कार्यकाळात पिंपरी चिंचवड महापालिका कर्जबाजारी झाल्याचा आरोप केला. शहरात लुटारुंची टोळी दिवसाढवळ्या वावरत आहे. तर दुसरीकडे त्यांनी राष्ट्रवादीच्या माध्यमातून शरद पवार यांनी विकास कामे केल्याचे अजित पवारांनी सांगितले.