Ajit Pawar News : काय रे अजित पवार, पूर्वी येऊन फार बडबड करत होतास... तुझं तर काही लक्षच नाही! मुख्यमंत्र्यांच्या सभेआधी अजितदादांची तुफान फटकेबाजी

Pune News : भोर नगरपालिकेची निवडणूक भाजप आणि उपमुख्यमंत्री अजित पवार यांच्या राष्ट्रवादी काँग्रेससाठी अत्यंत प्रतिष्ठेची बनली आहे. काँग्रेसमधून भाजपमध्ये आलेल्या माजी आमदार संग्राम थोपटे यांनी ही निवडणूक अस्तित्वाची केली आहे. तर राष्ट्रवादी काँग्रेसचे आमदार शंकर मांडेकर यांनी देखील आपली पूर्ण ताकद झोकून दिली आहे.

आजी-माजी आमदारांमधील टोकाच्या वादाने रंजक बनलेल्या या रणसंग्रामात थोपटेंसाठी थेट मुख्यमंत्री भोरच्या मैदानात उतरणार आहेत. त्यांची उद्या सभा होणार आहे. त्यापूर्वीच आपल्या लाडक्या आमदारासाठी उपमुख्यमंत्री अजित पवार यांनी मैदानात उतरत तुफान फटकेबाजी केल्याचं पाहायला मिळालं.

भोरमधील आयोजित सभेमध्ये बोलताना अजित पवार म्हणाले, माझी सभा झाल्यानंतर उद्या मुख्यमंत्री देवेंद्र फडणवीस येतील. तेही त्यांची भूमिका मांडतील. मात्र भोरकरांनी सगळा विचार करावा आणि तुमच्या सद्द्विवेक बुद्धीला जे पटेल तेच करा. तो अधिकार तुम्हाला संविधानाने दिला आहे. त्यामुळे मी बळजबरी करायला आलो नसून मी विनंती करायला आलो आहे. मी समजून सांगायला आलो आहे, असं अजित पवार म्हणाले.

अजित पवार पुढे म्हणाले, मी पुण्याचा पालकमंत्री आहे. ज्या पद्धतीने भोरकरांनी शंकर मांडेकर यांना आमदार केलं त्याच पद्धतीने भोरच्या नगरपालिकेमध्ये राष्ट्रवादीची सत्ता आणा, त्यानंतरची पुढची जबाबदारी माझी असेल. जर मी पुढच्या पाच वर्षात कुठे कमी पडलो तर पुढच्या एखाद्या सभेला आल्यानंतर मला सांगा" काय रे अजित पवार पूर्वी येऊन फार बडबड करत होतास रे, तुझं तर काही लक्षच नाही" हा सांगण्याचा तुमचा अधिकार आहे. लाडक्या बहिणीने देखील मला ते हक्काने सांगावे कारण मी तुमचा भाऊ आहे. त्यामुळे ते मी ऐकेल. परंतु ते सांगण्याची वेळ मी तुमच्यावर येऊ देणार नाही, असा विश्वास अजित पवारांनी दिला.

ज्यांना उमेदवारी मिळाली नाही, त्यांनी नाराज होण्याची गरज नाही. त्यांचा मी नक्कीच दुसरीकडे कुठेतरी विचार करेन. एकदा निवडून आल्यानंतर मी कोणाच्या कामात लुडबुड करणार नाही. उमेदवार चांगले की वाईट, हे ओळखण्याची जबाबदारी तुमची आहे. मी तर एकही ‘दोन नंबर’चा धंदेवाला उमेदवार दिलेला नाही. पण, तुम्ही बघा कोणी दिलेत, असे म्हणत अजित पवार यांनी भाजप आणि थोपटे यांनी दोन नंबरचे धंदेवाले उमेदवार दिल्याचे अप्रत्यक्षपणे सांगितले.

माझ्याकडे राज्य सरकारमध्ये काही अधिकार आहेत. मात्र माझ्यापेक्षा जास्तीचे अधिकार मुख्यमंत्र्याकडे आहेत, हे देखील मी मान्य करतो. परंतु माझ्याकडे जे अधिकार आहेत, त्या अधिकारातून विकासकामांना मदत करणं हे माझ्या हातात आहे. कोणतीही फाईल मंजूर होत असताना पहिली सही हे अर्थमंत्र्यांची असते आणि त्यानंतर ती मुख्यमंत्र्यांकडे जाते, असं अजित पवार म्हणाले.