Ajit Pawar vs Murlidhar Mohol : अजितदादांच्या साम्राज्याला मुरलीधर मोहोळांचं आव्हान; सलग तीन टर्म अध्यक्ष असलेल्या आखाड्यात होणार महाकुस्ती

Murlidhar Mohol News : उपमुख्यमंत्री अजित पवार हे महाराष्ट्र राज्य ऑलिंपिक संघटनेच्या निवडणुकीत उतरले आहे. 2013 पासून संघटनेचे अध्यक्ष आहेत. तीन टर्म अध्यक्ष असलेल्या अजितदादांनी चौथ्यांदा अध्यक्षपदासाठी अर्ज दाखल केला आहे. मात्र, यावेळी त्यांचा मार्ग सोप्पा नाही. कारण पुण्याचे खासदार, केंद्रीय मंत्री मुरलीधर मोहोळ हे देखील या निवडणुकीत उतरले असून ते देखील आपला उमेदवारी अर्ज दाखल करणार आहेत.

अजित पवार यांचे मागील 12 वर्ष महाराष्ट्र राज्य ऑलिंपिक संघटनेवर वर्चस्व आहे. तीन टर्म अध्यक्षपद त्यांनी भुषवले. या तीनही निवडणुकीमध्ये त्यांना तगड्या उमेदवाराचे आव्हान नव्हते. मात्र, मुरलीधर मोहोळ यांच्या रुपाने पहिल्यांदा त्यांच्यासमोर मोठे आव्हान असणार आहेत.

दोन नोव्हेंबरला निवडणूक पार पडणार असून 60 सदस्य या निवडणुकीत मतदान करणार आहेत. संघटनेशी जोडल्या गेलेल्या 30 संघटनांमधून प्रत्येक दोन जण या निवडणुकीत मतदान करणार आहेत. दोन दिवसांपूर्वी कबड्डी संघटनेतून अजित पवारांनी उमेदवारी अर्ज दाखल केला होता. तर, कुस्ती महासंघाच्या माध्यमातून मोहोळ आज उमेदवारी अर्ज दाखल करणार आहेत.

मोहोळ हे उमेदवारी अर्ज दाखल करण्यासाठी प्रत्यक्ष हजर राहणार नाहीत. त्यांच्या सहकाऱ्यांमार्फत अर्ज दाखल केला जाणार आहे. 2025 ते 2029 या काळासाठी निवडणूक होणार आहे. अध्यक्षपदासोबत पदाधिकाऱ्यांची देखील निवडणूक होणार आहे. त्यातच अध्यक्षपदासाठी दादा विरुद्ध अण्णा अशी लढत होणार असल्याने ही निवडणूक चुरशीची होणार आहे.