Laxman Hake : लक्ष्मण हाकेंवर पुरंदरमध्ये हल्ल्याचा प्रयत्न; ‘चहा पित असताना शिवीगाळ करत माझ्या अंगावर धावून आले...’

Pune, 31 August : मनोज जरांगे पाटील यांच्या मुंबईतील आरक्षणामुळे महाराष्ट्रातील सामाजिक वातावरण तापताना दिसत आहे. विशेषतः ओबीसी आणि मराठा नेत्यांमध्ये आरक्षणाच्या मुद्यावरून शाब्दीक चकमक होताना दिसत आहे. ओबीसी नेते लक्ष्मण हाके आज (ता. 31 ऑगस्ट) पुणे जिल्ह्याच्या दौऱ्यावर असताना पुरंदर तालुक्यातील नीरा येथे त्यांच्या हल्ल्या करण्याचा प्रयत्न झाला. याबाबतची माहिती त्यांनी स्वतःची दिली आहे.

लक्ष्मण हाके म्हणाले, माझा आज सातारा जिल्ह्यातील लोणंद शहरात नियोजित दौरा होता. काही उद्‌घाटने आणि गणपती उत्सवाच्या आरत्या होत्या. त्यानिमित्ताने पुण्यातून निघाल्यानंतर पुणे जिल्ह्यातील पुरंदर तालुक्यातील नीरा या गावी आम्ही चहा पिण्यासाठी थांबलो होतो.

ते म्हणाले, चहा प्यायला थांबल्यानंतर सुमारे दहा ते पंधरा भ्याड लोक दुचाकीवरून माझ्याकडे आले. त्यांच्या दुचाकींना झेंडे लावण्यात आलेले होते. त्यांनी छत्रपती शिवाजी महाराजांच्या नावाने घोषणा दिल्या. घोषणा देऊन माझा निषेध व्यक्त करण्याचा प्रयत्न केला.

मला शिवीगाळ करत माझ्या अंगावर धावून येण्याचा प्रयत्न झाला. त्यांनी दहा जणांनी त्या ठिकाणी दहशत निर्माण करण्याचा प्रयत्न केला. तसेच, माझ्यावर भ्याड हल्ला करण्याचा प्रयत्न केला, असे हाके यांनी नमूद केले.

ते म्हणाले, माझ्याबरोबर पुणे शहर, सातारा आणि पुणे ग्रामीणचे पोलिस कर्मचारी हेाते. या पोलिस कर्मचाऱ्यांनी माझी त्यांच्या तावडीमधून सुटका केली आणि त्यांनी मला गाडीत आणून बसवलं. हा माझ्यावर भ्याड पद्धतीचा हल्ला आहे.

आम्ही कोणाच्याही ताटातील मागत नाही. आम्ही कोणाच्याही आरक्षणाला विरोध करत नाही. आमचं आरक्षण टिकलं पाहिजे, अशी आमची मागणी आहे. आज महाराष्ट्रात फिरत असताना अशा पद्धतीच्या झुंडशाहीला आम्हाला सामोरे जावे लागत आहे. माझी ओबीसी बांधवांना कळकळीची विनंती आहे की, आपलं आरक्षण टिकवण्यासाठी आपण सावध झालं पाहिजे, असेही आवाहन लक्ष्मण हाकेंनी केले आहे.