Rahul Kul News: भाजप आमदार राहुल कुल यांना मोठा धक्का; भीमा पाटस कारखान्याचे साहित्य जप्त करा, साखर आयुक्तांचा आदेश

Pune News: भाजपचे आमदार राहुल कुल अध्यक्ष असलेल्या भीमा पाटस सहकारी साखर कारखान्यावर साखर आयुक्तांनी कारवाईचा बडगा उगारला आहे. भीमा सहकारी कारखान्याचे साहित्य जप्त करा, असा आदेश साखर आयुक्तांनी दिला आहे. राहुल कुल यांना हा मोठा धक्का मानला जात आहे.

भीमा सहकारी साखर कारखान्याकडे शेतकऱ्यांचे ऊसाचे ५ कोटी ७८ लाख  रूपये थकीत असल्यामुळे साखर आयुक्तांनी ही कारवाई केली आहे. शेतकऱ्यांनी याबाबत साखर आयुक्तांकडे तक्रार केली आहे. तक्रारीची दखल साखर आयुक्तांनी घेतली आहे.

याबाबत तातडीने खुलासा करावा, आणि शेतकऱ्यांचे पैसे कधी देणार ? याबाबत तातडीने उत्तर द्या, अशी विचारणा कारखान्याला पाठवलेल्या नोटीशीमध्ये करण्यात आली होती. मात्र, याबाबत साखर कारखान्याकडून कुठलीही योग्य कारवाई करण्यात आली नाही. शेतकऱ्यांचे पैसे देखील परत केले नसल्याची माहिती आहे.

काही दिवसापूर्वी ठाकरे गटाचे खासदार संजय राऊत यांनी राहुल कुल यांच्यावर भीमा सहकारी साखर कारखान्यात ५०० कोटींचा आर्थिक गैरव्यवहार केल्याचा आरोप केला होता.

राहुल कुल हे पुण्यातील दौंड तालुक्यातील भाजपचे आमदार आहेत. भीमा सहकारी साखर कारखान्याचे ते अध्यक्ष आहेत. राष्ट्रवादी, रासप आणि भाजप असा त्यांचा राजकीय प्रवास आहे. २००९ मध्ये त्यांनी राष्ट्रवादीला सोडचिठ्ठी देत रासपकडून दौंडमध्ये विजय मिळवला होता. २०१९ मध्ये राहुल कुल यांनी रासपला रामराम ठोकत भाजपात प्रवेश केला आहे.