Black Magic : अजित पवारांच्या जवळच्या नेत्याच्या घराबाहेर जादूटोणा, महिलेच्या विरोधात गुन्हा

Pune News : विद्येचे माहेरघर आणि राज्याची सांस्कृतिक राजधानी असलेल्या पुण्यामध्ये जादूटोण्यासारखा प्रकार घडल्याचे समोर आले आहे. हा प्रकार उपमुख्यमंत्री अजित पवार यांच्या निकटवर्ती असलेल्या आणि पुणे महापालिकेत माजी महापौर दत्ता धनकवडे यांच्या घराच्या समोर घडला आहे. या प्रकरणी एका महिलेच्या विरोधात भारती पोलिस ठाण्यात गुन्हा दाखल करण्यात आला आहे.

पोलिसांमध्ये दिलेल्या तक्रारीनुसार, एका महिलेने विदयादिप गृह संस्था मर्यादित स.नं. ३२/०२/१० धनकवडी पुणे सोसायटी मध्ये मागील ०४ महिन्यापासुन फक्त अमावस्याच्या दिवशी वेगवेगळया व्यक्तीच्या घराचे समोर नारळ, दही-भात, उकडलेली अंडी, लिंबु, काळा अभिर ठेवत होती. त्या महिलेने शनिवारी (ता.29) रात्री आठच्या सुमारास अमावस्याच्या असल्याने दत्ता धनकवडे यांच्या बंगल्याच्या समोर नारळ, दही-भात, उकडलेली अंडी, लिंबु, काळा अभिर ठेवत असताना दिसून आली.

याबाबत 'सरकारनामा'शी बोलताना दत्ता धनकवडे यांनी सांगितले की, काल (शनिवारी) सायंकाळी साडेसात आठच्या दरम्यान एक महिला आमच्या सोसायटी जवळ काही भावल्या आणि इतर गोष्टींसह जादूटोणा करत असल्याचा संशय सोसायटीतील रहिवाशांना आला. त्यानंतर त्यांनी त्या महिलेला पकडून पोलिसांच्या स्वाधीन केले.

गेल्या काही दिवसांपासून धनकवडी परिसरातील अनेक घरांच्या बाहेर असे जादूटोणा होण्याचे प्रकार घडत असल्याचे समोर आले होते. आणि काल (शनिवारी) अमवस्या असल्याने असा काहीतरी प्रकार घडेल, अशी शंका असल्याने नागरिक या गोष्टीवर लक्ष ठेवून होते. अशातच संशयित महिलेने आमच्या घरात जवळील सोसायटीच्या परिसरात भावलीसह अघोरी प्रकार करण्यात सुरुवात केली. त्यानंतर नागरिकांनी तत्परता दाखवत त्या महिलेला पोलिसांच्या हवाली केला आहे, असे देखील धनकवडे यांनी सांगितले.

पोलिसांनी आता हा नेमका प्रकार काय आहे? याची रीतसर चौकशी करावी तसेच या महिलेला कोणी हे करण्यासाठी सांगितलं आहे का? याबाबत देखील पोलिसांनी चौकशी करून सर्व सत्य समोर आणावे, अशी आमची मागणी असल्याचं दत्ता धनकवडे यांनी सांगितले.