Chandrakant Patil: हे तिसऱ्यांदा घडलंय! चंद्रकांतदादा संतापले; कारवाई करा...

Pune News : कोथरूडमधील टेकड्यांवर वनराईला आग लावून नष्ट करणाऱ्या टवाळखोरांवर कठोर कारवाई करावी, असा आदेश मंत्री चंद्रकांत पाटील यांनी वन विभागाला दिला आहे. कोथरूडमधील म्हातोबा टेकडीवर शनिवारी आग लागून अनेक झाडे नष्ट झाली. याची गंभीर दखल घेत चंद्रकांत पाटलांनी अधिकाऱ्यांना सूचना दिल्या आहेत.

कोथरूड येथील, महात्मा, म्हातोबा, पाषाण भागातील टेकड्यांवर वृक्ष लागवड केली गेली आहे. त्यापैकी म्हातोबा टेकडीवर ६५०० औषधी वनस्पतींसह पर्यावरण संवर्धनात अतिशय महत्वाचे ठरणारे वृक्ष लावले आहेत. त्याच्या संवर्धनासाठी विशेष व्यवस्था देखील केली आहे. यामध्ये टेकडीवरील झाडांना पाण्याचे पाईप, टाक्या, खते, वृक्ष संवर्धनासाठी आवश्यक बाबीची व्यवस्था करण्यात आल्या आहेत. त्यांच्या देखरेखीसाठी सात जणांची नेमणूक केली आहे.

काही टवाळखोर या पर्यावरण संवर्धनाच्या कामात खोडा घालण्याचे काम करीत आहेत. म्हातोबा टेकडीवर शनिवारी तिसऱ्यांदा आगीची घटना घडल्याने येथील वनराईला धोका निर्माण झाला आहे. त्यामुळे याची गंभीर दखल घेऊन कोथरूडचे आमदार आणि राज्याचे उच्च व तंत्रशिक्षण मंत्री चंद्रकांत पाटील यांनी वनविभागाच्या अधिकाऱ्यांना कठोर कारवाईचे निर्देश दिले.

पाटील म्हणाले, "टेकडी हा पुण्याचा श्वास आहे. टेकड्यांवर चांगले वातावरण असल्याने नियमित व्यायाम करण्यासाठी मोठ्या संख्येने नागरिक येतात. मात्र, कोथरूडमधील टेकड्यांवर काही टवाळखोर वनसंपदेचं नुकसान करीत आहेत. त्यामुळे वन विभागाने याची गंभीर दखल घेऊन; कठोर कारवाई करावी, असा आदेश दिला आहे.

घटनेचं गांभीर्य ओळखून चंद्रकांतदादा उद्या (सोमवार) सकाळी ७ वाजता म्हातोबा टेकडीची पाहणी करणार आहेत. अशा प्रकारच्या घटनांवर आळा घालण्यासाठी वन विभागाचे अधिकारी, पोलिस प्रशासन यांच्यासोबत आढावा घेणार आहेत. वृक्ष संवर्धनासाठी पर्यावरण प्रेमींशी संवाद साधणार आहेत.