Sharad Pawar : EVM मध्ये घोळ अन् 15 टक्के मतं सेट? मतमोजणी प्रक्रियेवर पवारांची पहिली प्रतिक्रिया; म्हणाले, "शेवटच्या 2 तासांत..."

Pune News, 30 Nov : ज्येष्ठ सामाजिक कार्यकर्ते बाबा आढाव यांनी पुण्यातील महात्मा फुले वाडा येथे EVM विरोधात आत्मक्लेष आंदोलन सुरु आहे. त्यांच्या आंदोलनाचा आज तिसरा दिवस आहे. या आंदोलाना जेष्ठ नेते शरद पवार यांनी पाठिंबा दिला आहे. पवारांनी उपोषणस्थळी जात आढाव यांची भेट घेतली. (Sharad Pawar meets Baba Adhaav )

दोघांमधील चर्चे दरम्यान, बाबा आढाव (Baba Adhav) यांनी सरकारला विरोधक नकोच आहेत, असं वक्तव्य केलं. तर आढाव यांच्या भेटीनंतर शरद पवारांनी पत्रकारांशी संवाद साधला. या निवडणुकीत सत्तेचा गैरवापर करण्यात आल्याचा आणि पैशांचा मोठ्या प्रमाणात वापर केल्याची लोकांमध्ये चर्चा असल्याचं पवार म्हणाले. तसंच यावेळी त्यांनी ईव्हीएम वर संशय देखील व्यक्त केला.

यावेळी पत्रकारांनी शरद पवारांना (Sharad Pawar), "काही उमेदवारांनी फेर मतमोजणीसाठी पैसे भरले आहेत. त्यामुळे मजमोजणी दरम्यान काही मतं सेट केल्याचा दावा केला जात आहे. यावर तुमचा विश्वास आहे का?" असा प्रश्न विचारला असता ते म्हणाले, "लोकांमध्ये अशी चर्चा आहे, पण सध्या माझ्या हातात त्याचा काही पुरावा नाही.

निवडणुकीपूर्वी काही लोकांनी ते कसं सेट केलं जात याबाबतचं प्रेझेंटेशन आम्हाला केलं होतं. मात्र आमची कमतरता की आम्ही त्यांच्यावर विश्वास ठेवला नाही. आम्हाला वाटलं निवडणूक आयोग (Election Commission) इतक्या टोकाची चुकीची भूमिका घेणार नाही. आम्ही या संस्थेवर गैरविश्वास व्यक्त केला नाही. मात्र, निवडणुकीच्या निकालानंतर मात्र यामध्ये काहीतरी तथ्य असल्याचं दिसत आहे."

तसंच यावेळी फेरमतमोजणी आणि 15 टक्के मतं सेट केली गेली त्यामुळे तुम्हाला ईव्हीएमवर संशय आहे का? असं विचारलं असता ते म्हणाले, "फेर मतमोजणीतून काही फारसं पुढे येईल असं वाटत नाही. त्याबाबत मला शंका आहे. तसंच शेवटच्या दोन तासांत 7 टक्क्याच्या वर मतदान झालं त्याबाबतची माहिती अत्यंत धक्कायक आहे. माझा मतं सेट केली यावर आधी विश्वास बसत नव्हता पण आता त्यात तथ्य आहे असं त्यात वाटतयं", असंही पवार म्हणाले.