Praveen Darekar : सहकार क्षेत्राला पवार आणि शाहंच्या चर्चेतून दिशा मिळेल; दरेकरांनी व्यक्त केला विश्वास

Pune Maha Conclave News :''शरद पवार यांचे सहकार क्षेत्राला मोठे योगदान राहिलेलं आहे. सहकाराला ते आशीर्वाद देत असतात. त्यांना यातील बारकावे माहीत आहेत. मी स्वतः 70 ते 80 सहकारी बँकांचा आढावा घेतला. तसेच प्रत्येक बँकेला अर्धा तास देऊन मी समजून घेत आहे. तसेच या सहकारी बँकांबाबत लवकरच राज्य सरकारला निवेदनही देणार आहे'', असं प्रवीण दरेकर यावेळी म्हणाले.

''सहकाराची जाण अमित शाह यांनाही आहे. त्यामुळे शरद पवार आणि अमित शाह यांच्या चर्चेतून सहकाराला दिशा मिळेल. सहकार क्षेत्रात अनेक अडचणी आहेत, त्याला उर्जितावस्था देण्याची गरज आहे'', असे मत प्रवीण दरेकर यांनी व्यक्त केलं. 'सकाळ'कडून महाकॉन्क्लेव्हचे पुण्यात आयोजन करण्यात आले आहे. यामध्ये आज सहकार क्षेत्रावर चर्चा झाली. यावेळी भाजप नेते प्रवीण दरेकर बोलत होते.

दरेकर म्हणाले, ''आज सहकारी बँकांसमोर अनेक अडचणी आहेत. बँका अडचणीत असल्यामुळे सरकारने त्यांना निधी द्यायला हवा. त्यामुळे बुडणाऱ्या बँका सुस्थितीत येऊ शकतात. सध्या सहकारी बँकांची आर्थिक उलाढाल ही कमी होत असल्याचे दिसते. पण काही बँका व्यक्तिगत ताकदीवर पुढे जात आहेत. मात्र, अडचणी आजही कायम आहेत'', असंही ते यावेळी म्हणाले.

''सहकारावर मात करण्यासाठी एकत्रित पुढे जायला पाहिजे. अमित शाहांनी केंद्रामध्ये सहकार खात निर्माण केलं. त्यामुळे देशाच्या पातळीवर या विषयाला महत्व प्राप्त झालं आहे. तसेच केंद्र आणि राज्य सरकार मिळून महाराष्ट्र सक्षम करण्याची आवश्यकता आहे. या पार्श्वभूमीवरच येत्या काळात आपण सहकार क्षेत्र अधिक सक्षम करूयात'', असं दरेकर म्हणाले.