PDCC Bank Election : भरणे, थोपटे,वळसे पाटलांसह ७ आजी-माजी आमदारांचे वर्चस्व पणाला; ऐन दिवाळीत रंगणार 'रणसंग्राम'!

Pune News : पुणे जिल्हा मध्यवर्ती सहकारी बँकेच्या पंचवार्षिक निवडणुकीची रणधुमाळी उडाली असून, ऐन दिवाळीच्या तोंडावर बँकेत सत्तासंघर्षाचा मोठा राजकीय संग्राम पाहायला मिळणार आहे. जिल्ह्यातील सहकार आणि राजकीय सत्ताकारणाचा केंद्रबिंदू असलेल्या या बँकेत तब्बल 7 आजी-माजी आमदार आणि मंत्र्यांची प्रतिष्ठा पणाला लागली आहे.

गेल्या ३० वर्षांहून अधिक काळ बँकेच्या संचालक मंडळावर आपले स्थान कायम ठेवणाऱ्या प्रस्थापितांनी पुन्हा एकदा बँकेवर पकड घट्ट करण्यासाठी जोरदार मोर्चेबांधणी सुरू केली आहे.

बँकेच्या राजकारणात दीर्घकाळापासून वर्चस्व असलेल्या नेत्यांनी आपले गड राखण्यासाठी पुन्हा कंबर कसली आहे. कृषिमंत्री दत्तात्रय भरणे, माजी गृहमंत्री दिलीप वळसे पाटील, माजी आमदार संग्राम थोपटे, दिलीप मोहिते, रेवणनाथ दारवटकर, आप्पासाहेब जगदाळे आणि रमेश थोरात यांनी बँकेत आपले स्थान तब्बल ३० वर्षे कायम ठेवले आहे. तसेच माजी आमदार संजय जगताप यांच्या घराण्यातही बँकेचे संचालक पद नेहमीच राहिले असून, या दिग्गजांनी नेहमीच स्थानिक राजकारणापेक्षा बँकेच्या राजकारणाला पसंती दिली आहे.

त्यामुळे या सर्वच दिग्गजांनी आपल्यासाठी पूरक असे जास्तीत जास्त ठराव स्थानिक सोसायटीमध्ये करण्यासाठी गावागावात फिल्डिंग लावली असल्याचे पाहायला मिळत आहे. यातून मोठ्या प्रमाणात राजकीय संघर्ष आणि आर्थिक देवाण-घेवाण देखील होत आपल्या चर्चा राजकीय वर्ग सुरू आहेत.

राष्ट्रवादी काँग्रेसचे वर्चस्व असलेल्या या गडावरती आता भाजपने देखील लक्ष केंद्रित केला असल्याचं पाहायला मिळत आहे. त्यामुळे राज्यात मित्रपक्ष असलेल्या दोन पक्षांमध्ये मोठ्या प्रमाणात संघर्ष ऐन दिवाळीत पाहायला मिळणार आहे.

आकडेवारी आणि निवडणुकीची रचना

एकूण मतदार: ९ हजार २१६ मतदार

संस्था सभासद: ७,५१७ आणि व्यक्ती सभासद: १,६९९

संचालक मंडळ: एकूण २१ जागांसाठी ही निवडणूक होणार आहे.

गट रचना: 'अ' वर्ग तालुका गट (१३ जागा), 'ब' वर्ग (१ जागा), 'क' वर्ग (१ जागा), 'ड' वर्ग (१ जागा) आणि विविध राखीव प्रतिनिधी (५ जागा).