Gopichand Padalkar News: शरद पवारांबाबत वादग्रस्त विधान करणाऱ्या गोपीचंद पडळकरांना कोर्टाचा मोठा दिलासा

Pune News : भाजपचे नेते आणि विद्यमान आमदार गोपीचंद पडळकर यांना राष्ट्रवादी काँग्रेस शरद चंद्र पवार पक्षाचे अध्यक्ष शरद पवार यांच्या विरोधात 2020 मध्ये केलेल्या वादग्रस्त विधानप्रकरणी बारामती न्यायालयाने निर्दोष मुक्तता दिली आहे. यामुळे भाजप नेते गोपीचंद पडळकर (Gopichand Padalkar) यांना मोठा दिलासा मिळाला आहे.

कोरोनाच्या काळात, म्हणजे 2020 मध्ये गोपीचंद पडळकर यांनी एका पत्रकार परिषदेत राष्ट्रवादी काँग्रेसचे संस्थापक आणि माजी केंद्रीय मंत्री शरद पवार (Sharad Pawar) यांच्यावर टीका करताना त्यांना “महाराष्ट्राला झालेला कोरोना” असे संबोधले होते. हे विधान चांगलेच गाजले होते आणि राजकीय वर्तुळात मोठी खळबळ उडाली होती. या विधानानंतर राष्ट्रवादी काँग्रेस पक्षाच्या कार्यकर्त्यांनी संताप व्यक्त केला होता.

या वक्तव्याच्या पार्श्वभूमीवर, राष्ट्रवादी काँग्रेसचे तत्कालीन बारामती शहराध्यक्ष अमर धुमाळ यांनी बारामती शहर पोलीस ठाण्यात पडळकर यांच्याविरोधात गुन्हा दाखल केला होता. त्यानंतर पोलिसांनी तपास करून चार्जशीट दाखल करत ही केस बारामती न्यायालयात सादर केली.

पडळकर यांनी सुरुवातीला जामीन घेतला होता, परंतु त्यानंतर अनेक वेळा न्यायालयाने समन्स बजावूनही ते हजर झाले नाहीत. त्यामुळे न्यायालयाने त्यांच्याविरोधात अटक वॉरंटही जारी केले होते.

दरम्यान, मंगळवारी (ता.3) बारामतीच्या पुजारी न्यायालयात सुरू असलेल्या या खटल्यात न्यायालयाने चार साक्षीदारांची साक्ष तपासली. सुनावणी दरम्यान, न्यायालयाने नमूद केले की, पडळकर यांचे विधान हे एखाद्या व्यक्तीविषयी होते, संपूर्ण समाज किंवा जातीय गटाविषयी नव्हते. त्यामुळे या विधानामुळे कोणतेही जातीय दंगे भडकले नाहीत किंवा सामाजिक तेढ निर्माण झाली नाही. या निरीक्षणाच्या आधारे न्यायालयाने गोपीचंद पडळकर यांना सर्व आरोपांतून निर्दोष घोषित केले.