Vaishnavi Hagwane case : हगवणे प्रकरणात नाव येताच जालिंदर सुपेकर यांना दणका; सरकारने काढला आदेश...

Pune News : पुण्यातील वैष्णवी हगवणे या विवाहितेने सासरच्या जाचाला कंटाळून गळफास घेऊन आत्महत्या केली होती. सुनेला त्रास देत आत्महत्येस प्रवृत्त केल्याचा आरोप हगवणे कुटुंबावर करण्यात आला. याप्रकरणी पाच जणांवर गुन्हा दाखल करण्यात आला असून त्यांना अटक करण्यात आली आहे. त्यातच दुसरीकडे हगवणे यांचे नातेवाईक असलेले विशेष पोलीस महानिरीक्षक जालिंदर सुपेकर यांच्याकडे असलेल्या कारागृह उप महानिरीक्षक या पदाचा अतिरिक्त कार्यभार राज्य सरकारने काढून घेत दणका दिला आहे.

सुपेकर यांच्याकडे कारागृह उप महानिरीक्षक या पदाचा नाशिक, छत्रपती संभाजीनगर, नागपूर येथील या तीन ठिकाणच्या पदाचा अतिरिक्त कार्यभार काढण्यात आला आहे. तशा स्वरूपाचे लेखी आदेश दिले आहेत. कारागृह उप महानिरीक्षक हे महत्त्वाचे व जबाबदारीचे पद आहे. सुपेकर यांच्याकडे रिक्त असलेल्या नाशिक, छत्रपती संभाजीनगर, नागपूर येथील कारागृह उप महानिरीक्षक या पदाचा कार्यभार होता.

जालिंदर सुपेकर हे येरवडा जेलचे महानिरीक्षक असून त्यांच्यावर तीन ठिकाणची अतिरिक्त जबाबदारी होती. आता त्यांच्याकडे असलेली ती जबाबदारी काढून घेण्यात आली. वैष्णवी हगवणे हिचे वडील आणि उपमुख्यमंत्री अजित पवार (Ajit Pawar) यांच्यामध्ये एक बैठक झाली. यादरम्यान अजित पवारांनी थेट फोन सुपेकरांना केला होता. वैष्णवी हगवणे प्रकरणात दररोज धक्कादायक खुलासे होताना दिसत आहेत. हगवणे कुटुंबियांच्या वकिलाने तर वैष्णवीच्या चरित्र्यावरच संशय घेतला होता.

दरम्यान, सुपेकर यांच्यावर आरोप करण्यात आला आहे की, त्यांनी 2022 मध्ये निलेश चव्हाण याला शस्त्र परवाना दिला, ज्याला यापूर्वी ग्रामीण पोलीस आणि जिल्हाधिकाऱ्यांनी परवाना नाकारला होता . या प्रकरणावर सामाजिक कार्यकर्त्या अंजली दमानिया आणि राष्ट्रवादी काँग्रेसच्या (NCP) प्रवक्त्या रूपाली ठोंबरे यांनी सुपेकर यांच्यावर गंभीर आरोप केले आहेत.हे आरोप सुपेकर यांनी फेटाळून लावले आहेत.

दरम्यान, वैष्णवीच्या मृत्यूपूर्वी 24 तासांत तिच्या शरीरावर 15 जखमा झाल्याचे शवविच्छेदन अहवालात समोर आले आहे, ज्यावरून तिला सातत्याने शारीरिक छळ झाला असल्याचा निष्कर्ष निघत आहे. वैष्णवी हगवणे यांच्या आत्महत्येनंतर पोलिस यंत्रणेवरील तणाव वाढला आहे.