Pune News : उपमुख्यमंत्री अजित पवार यांच्या राष्ट्रवादी काँग्रेसचे आमदार संग्राम जगताप यांनी दिवाळीच्या खरेदीबाबत केलेल्या कट्टर हिंदुत्ववादी वक्तव्यामुळे पक्षाने त्यांना कारणे दाखवा नोटीस बजावली आहे. हे वक्तव्य पक्षाच्या 'शिव-शाहू-फुले-आंबेडकर' विचारधारेशी विसंगत असल्याचे पक्ष नेतृत्वाने स्पष्ट केले आहे. उपमुख्यमंत्री अजित पवार यांनीही याप्रकरणी कठोर भूमिका घेतली असून, पक्षाच्या विचारधारेचे पालन न करणाऱ्यांवर मोठी कारवाई होणार असल्याचे संकेत दिले आहेत.
काय म्हणाले होते संग्राम जगताप?
अहमदनगर शहरातील आमदार संग्राम जगताप यांनी नुकतेच एका कार्यक्रमात बोलताना, "दिवाळीची खरेदी फक्त हिंदू दुकानदारांकडूनच करा," असे आवाहन केले होते. त्यांनी मुस्लिम व्यापाऱ्यांकडून खरेदी न करण्याबाबत आवाहन केले होते. हे वक्तव्य सोशल मीडियावर व्हायरल झाले आणि राजकीय वाद सुरू झाला. नंतर अजित पवार यांनी संग्राम जगताप यांना नोटीस बजावण्यात येईल, असं सांगितलं होतं.
राष्ट्रवादी काँग्रेसचे प्रदेशाध्यक्ष आणि खासदार सुनील तटकरे यांनी आज संग्राम जगताप यांना कारणे दाखवा नोटीस पाठवली आहे. नोटीसमध्ये म्हटले आहे की, हे वक्तव्य पक्षाच्या समावेशक विचारधारेला धक्का देणारे आहे आणि संविधानाच्या मूळभूत तत्त्वांना छेद देणारे आहे. जगताप यांना 3 दिवसांत खुलासा सादर करण्याचे आणि यापुढे अशी वक्तव्ये टाळण्याचे नमूद केले आहे. पक्षाने हे प्रकरण गंभीरतेने घेतले असून, नोटीस बजावण्यामागे पक्षाची एकसंधता राखण्याचा उद्देश असल्याचे सांगितले.
याबाबत पुण्यामध्ये पत्रकारांशी बोलताना पुन्हा एकदा अजित पवार यांनी कठोर भूमिका घेतली आहे. अजित पवार म्हणाले, याबाबत मी काल बोललो होतो. की नोटीस पाठवली जाणार आहे. पक्षाच्या विचारधारेला न पटणारे वक्तव्य संग्राम जगताप यांनी केलं होतं. त्यामुळे आज प्रदेशाध्यक्षांनी नोटीस काढली आहे.
तुम्ही एखाद्या राजकीय पक्षाचे सभासद अथवा सदस्य असाल तर त्या पक्षाच्या विचारधारेच्या विपरीत बोलत असाल तर कोणताही पक्ष ते सहन करणार नाही. त्यानुसार आम्हीदेखील त्यांना नोटीस बजावली आहे. पक्षाची काही प्रोसिजर आहे. नोटीस बजावल्यानंतर त्या नोटशीला आमदार जगताप नेमकं काय उत्तर देतात, हे पाहण्यात येईल. त्यानंतर आम्ही संग्राम जगताप यांच्याबाबत निर्णय घेणार असल्याचे सांगत अजित पवार यांनी कठोर पावले उचलण्याचे संकेत दिले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.