Manoj Jarange Patil Sabha : मनोज जरांगे पाटलांनी एकाच दिवशी घेतल्या पाच जिल्ह्यांत सभा; सरकारचे वाढविले टेन्शन

Walchandnagar : मराठा समाजाला आरक्षण मिळवून देण्यासाठी पेटून उठलेले जालना जिल्ह्यातील मनोज जरांगे पाटील यांनी आज (शनिवारी ता. २१ ऑक्टोबर) एकाच दिवशी सातारा, सोलापूर, पुणे, नगर आणि बीड जिल्ह्यांत सभा घेतल्या. या पाच जिल्ह्यांतील सभांमधून त्यांनी मराठा आरक्षणाबाबत जनजागृती करून आरक्षण घेतल्याशिवाय थांबणार नसल्याचा इशारा देत सरकारचे टेन्शन वाढविले आहे. (Manoj Jarange Patil held meetings in five districts on the one day)

मराठा समाजाला आरक्षण मिळावे, यासाठी मनोज जरांगे पाटील यांनी गेली दोन दिवसांपासून पाच जिल्हे पिंजून काढले आहेत. मराठा समाजाला कशा पद्धतीने आरक्षण मिळू शकते, याचा रोडमॅप त्यांनी प्रत्येक सभेतून सादर केला. सभेतही त्यांनी मराठा कार्यकर्त्यांशी संवाद साधत आरक्षण घेतल्याशिवाय आपण थांबणार नाही, असा निर्धारही बोलून दाखवला. जरांगे पाटील यांनी आज (शनिवारी) एकाच दिवसात पाच जिल्ह्यांमध्ये सभा घेऊन मराठा समाजाच्या आरक्षणाबाबत जागृती केली.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मनोज जरांगे हे शुक्रवारी रात्री सातारा जिल्ह्यातील दहिवडी येथे मुक्कामी होते. आज सकाळी त्यांनी सातारा जिल्ह्यातील शिखर शिंगणापूरच्या महादेवाचे दर्शन घेतले. त्या ठिकाणी छोटेखानी सभा घेत मराठा समाजाच्या कार्यकर्त्यांशी त्यांनी चर्चा केली. दुपारी सोलापूर जिल्ह्यातील अकलूजमध्ये भव्य सभेचे आयोजन केले होते. हजारो नागरिकांनी सभेसाठी गर्दी केली होती.

अकलूजच्या सभेनंतर पुणे जिल्ह्यातील इंदापूर शहरामध्येही सभा झाली. रखरखत्या उन्हामध्ये हजारो मराठा बांधवांनी सभेसाठी गर्दी केली होती. इंदापूरनंतर नगर जिल्ह्यातील कर्जतमध्ये सभेचे आयोजन करण्यात आले होते. आजच्या दिवसातील शेवटची सभा बीड जिल्ह्यातील भांभरसुंभा येथे झाली.

तत्पूर्वी शुक्रवारी (ता.२० ऑक्टोबर) जरांगे पाटील यांनी पुणे जिल्ह्यात सभा घेतल्या. त्यामध्ये सकाळी जुन्नरमध्ये शिवनेरीच्या पायथ्याशी मराठा समाजाच्या कार्यकर्त्याच्या भेटीगाठी घेऊन चर्चा केली. राजगुरुनगर, बारामती व सातारा जिल्ह्यातील फलटण आणि दहीवडीमध्ये सभा घेतल्या.