Prakash Ambedkar : मनोज जरांगे यांची निवडणुकीतून माघार, प्रकाश आंबेडकर म्हणाले, 'घरंदाज मराठा...'

सागर आव्हाड

Prakash Ambedkar News : वंचित बहुजन आघाडीने आपला जाहीरनामा आज (मंगळवारी) प्रसिद्ध केला. जाहीरनामा प्रसिद्ध करताना वंचितचे अध्यक्ष प्रकाश आंबेडकर यांनी मनोज जरांगे पाटील यांच्यावर निशाणा साधला. मनोज जरांगे पाटील यांनी निवडणुकीतून माघार घेऊन घरंदाज मराठ्यांच्या दबावातून रयतेतल्या मराठ्यांचा बळी दिला, असा दावा आंबेडकर यांनी केला.

प्रकाश आंबेडकर म्हणाले, मनोज जरांगे प्रत्येक जिल्ह्यात काकाला मतदान दिलं काय अन् पुतण्याला मतदान दिलं काय? सत्ता ही कुटुंबात राहणार आहे. त्यामुळे एक खुणगाठ बांधून यातील किती लायक अन् किती नालायक आहेत. याबाबत स्पष्टता करून कोणाला मतदान करायचे नाही, हे जरांगेंनी जाहीर करायला हवं.

विधानसभा निवडणुकीतील जरांगे पाटील रोल संपला असं आम्ही मानत नाही. 70 टक्के जागा ओबीसी समाजातील इच्छुकांना देण्यात आल्या आहेत. हे पाहता मराठा समाजाचे मतदान एकतर्फी होऊ शकते. तसेच ओबीसीचे मतदान ही एकतर्फी होईल, अशी परिस्थिती आहे. ओबीसी समाज वंचितकडे वळाला आहे, असा आमचा दावा आहे. आम्ही त्यांच्यासाठी लढतोय, त्यामुळं हा वर्ग आमच्यासोबत येईल, असे प्रकाश आंबेडकर म्हणाले.

सत्तेत सहभागी होणार

आमचे 15 आमदार निवडून आले तरी येणाऱ्या सत्तेत आम्ही भागीदार राहू. मग सोयाबीन आणि कापूसला योग्य मोबदला मिळावा यासाठी आम्ही पाचशे रुपये प्रति क्विंटल बोनस द्यायला लावणार आहेत, असे प्रकाश आंबेडकर म्हणाले. राज्याची लोकसंख्या 13 कोटीच्या घरात आहे, त्यामुळे आता दोन लाख रोजगार निर्मितीची गरज आहे. उंबरठे झिजवणारा वर्ग संपवायला हवा. तेंव्हा घराणेशाहीचे राजकारण संपुष्टात येईल, असे देखील आंबेडकर म्हणाले.

9 नोव्हेंबर आंबेडकरांच्या सभा

प्रकाश आंबेडकर यांच्यावर नुकतीच शस्त्रक्रीया करण्यात आली. डाॅक्टरांच्या सल्ल्याने ते विश्रांती घेत आहेत. मात्र, 9 नोव्हेंबरला सोलापूर येथून त्यांच्या सभांना सुरुवात होईल. आंबेडकर म्हणाले, माझ्या तब्येतीबाबत बऱ्यावाईट प्रतिक्रिया दिल्या. त्या सर्वांचे आभार मानतो. डॉक्टरांच्या सल्ल्यानुसार मी प्रचार करेन.