Prakash Ambedkar : नरेंद्र मोदींचा 'या' नावानेच उल्लेख करा, प्रकाश आंबेडकरांचा इंडिया आघाडीला सल्ला

Pune : इंडिया आघाडीत वंचित बहुजन आघाडीचा अजून समावेश झालेला नाही. मात्र, आपण इंडिया आघाडीच्या मदतीसाठी आपण पुढे आलो आहोत, असा दावा प्रकाश आंबेडकर यांनी केला आहे. मोदी विरोधकांना कुठल्या ना कुठल्या नावाने संबोधित करून त्यांचा पाणउतारा करत असतात. त्यामुळे मोदींचा देखील असाच उल्लेख करावा असा सल्ला प्रकाश आंबेडकरांनी इंडिया आघाडीला दिला असून त्यासाठी मोदींचा उल्लेख करण्यासाठी त्यांनी एक शब्द देखील सुचवला आहे.

प्रकाश आंबेडकरांनी (Prakash Ambedkar) ट्विटरच्या माध्यमातून मालदीव - भारत विषयावर टिप्पणी करत पंतप्रधान नरेंद्र मोदींवर (Narendra modi) निशाणा साधला होता. यात त्यांनी मोदींचा 'घोंचू' म्हणून शब्दोल्लेख केला होता. याच पार्श्वभुमीवर पुन्हा एक ट्विट केले आहे. मोदी आणि त्यांच्या पक्षाने वेळोवेळी काही विरोधी नेत्यांची अपमानास्पद नावे घेऊन खिल्ली उडवली आहे. काल मी मोदींना 'घोंचू' म्हटले. इंडिया आघाडीने हा शब्द घ्यावा आणि एकत्रीत पणे त्यांना 'घोंचू' म्हणा, असा सल्ला प्रकाश आंबेडकर यांनी दिला आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

महाविकास आघाडी आणि इंडिया आघाडीत सहभागी होण्यासाठी वारंवार पत्र पाठवून ही तुम्ही अजूनही आमचा पक्ष (वंचित बहुजन आघाडी) चा समावेश करून घेऊ शकला नाही, तरी आम्ही तुम्हाला मदत करू, असे देखील प्रकाश आंबेडकर यांनी आपल्या ट्विटमध्ये म्हटले आहे.

वंचित' लवकरच महाविकास आघाडीत

वंचित बहुजन आघाडीचा समावेश महाविकास आघाडित अजून झाला नाही. मात्र, वंचितच्या समावेशाबद्दल आघाडीतील सर्वच नेते सकारात्मक आहेत. लवकरच वंचितच्या समावेश होईल, असे वक्तव्य शिवसेनेचे नेते संजय राऊत यांनी केले होते. शरद पवार यांनी देखील वंचितच्या बाबत सकारात्मक भूमिका घेतली आहे. त्यामुळे लवकरच वंचितचा समावेश महाविकास आघाडीत होईल, असे सांगण्यात येत आहे.