Devendra fadnavis : पहिल्याच टर्मला मंत्रि‍पदाची लॉटरी; पण वर्षभरातच मिळवली अमित शहांची शाबासकी: फडणवीसांकडून मोहोळांचं तोंडभरून कौतुक

Pune News : चार दिवसापूर्वी केंद्रीय गृहमंत्री अमित शाह पुण्यात एका कार्यक्रमाच्या निमित्ताने आले होते. त्यावेळी मी त्यांच्यासोबत एका गाडीतून प्रवास केला. त्यावेळी शाह म्हणाले, 'आपका मोहोळ बहोत अच्छा मंत्री है. बहोत अच्छा काम करता है. ये पढकर आता है, इसका भविष्य बहोत उज्ज्वल है', या शब्दांत त्यांनी प्रशंसा केली. मोदी, शाह हे दोन्ही नेते कधीच कोणाला सर्टिफिकेट देत नाहीत. ते कधीच कोणाचे कौतुकही करीत नाहीत. त्यामुळे त्यांनी दिलेले हे प्रशस्तिपत्रक पाहता तुमची ट्रेन अगदी योग्य पटरीवरून चालली असल्याचे कौतुक त्यांनी करीत अशाच प्रकारे ती चालत राहिली पाहिजे, असे वक्तव्य मुख्यमंत्री देवेंद्र फडणवीस यांनी केले.

पुण्याचे खासदार मुरलीधर मोहोळ (Murlidhar mohol) यांच्या खासदारकीच्या वर्षपूर्तीच्या कार्यअहवालाचे प्रकाशन मुख्यमंत्री देवेंद्र फडणवीस यांच्या हस्ते पार पडले. यावेळी ते बोलत होते. यावेळी फडणवीस यांनी केंद्रीय मंत्री मोहोळ करीत असलेल्या कामाचे तोंडभरून कौतुक केले. यावेळी मंत्री चंद्रकांत पाटील, मंत्री यांच्यासह खासदार व आमदार उपस्थित होते.

मुरलीधर मोहोळ चांगले काम करीत आहेत. त्यांच्या कार्यक्रमाला असलेली गर्दी पाहता हे लक्षात येत आहे. त्यांनी वर्षभरात केले हे काम फक्त ट्रेलर आहे. अजून पिक्चर बाकी आहे. अर्धे कार्यकर्ते सभागृहाबाहेर आहेत. त्यामुळे या पुढे मोठा कार्यक्रम घ्या, असा सल्ला त्यांनी दिला.

मी पुण्याला आलो तरी त्याची दाखल घेतली जाते. कोणी तरी परवा 30 दिवसात 9 वेळा मुख्यमंत्री फडणवीस (Devendra fadnavis) पुण्याला आले, असल्याची बातमी दिली आहे. त्यामुळे आजचा हा कार्यक्रम महत्वाचा आहे. एक वर्षाचा कार्यकाळाचा अहवाल प्रकाशित करण्याचा निर्णय त्यांनी घेतला आहे. त्याशिवाय 24 तास चालणारे कार्यालय त्यांनी सुरु केले आहे. त्याचे उदघाटन आज होत आहे, जनतेच्या मदतीसाठी सदैव सुरु राहणार हे अशा स्वरूपाचे पहिलेच कार्यालय असल्याचे फडणवीस यांनी स्पष्ट केले.