Murlidhar Mohol: मुरलीधर मोहोळ यांचं अर्थमंत्री सीतारामन यांना पत्र! केली महत्त्वाची मागणी

Mulridhar Mohol: पुण्याचे खासदार तथा केंद्रीय सहकार व नागरी हवाई वाहतूक राज्यमंत्री मुरलीधर मोहोळ यांनी अर्थमंत्री निर्मला सीतारामन त्यांच्याकडे पत्राद्वारे महत्त्वाची मागणी केली आहे. गेल्या काही काळामध्ये केंद्र सरकारकडून अनेक गोष्टींवरचा जीएसटी माफ करण्यात आला आहे. त्यानुसार, आणखी काही गोष्टींवर जीएसटी कमी करण्यासंदर्भात सीतारामन यांना पत्र दिले आहे.

पुस्तक व कागदावर लागू असलेला वस्तू आणि सेवा कर (GST) दर कमी करण्याची मागणी प्रकाशन आणि शैक्षणिक क्षेत्राकडून जोर धरत आहे. याबाबतची मागणी मुरलीधर मोहोळ यांच्याकडे देखील करण्यात आली होती मागणीची दखल घेत मुरलीधर मोहोळ यांनी निर्मला सीतारामन यांना पत्र पाठवला आहे.

मोहोळ यांनी पत्रात म्हटलं की, "कागद आणि संबंधित साहित्यावरील जीएसटी दर १२ टक्क्यांवरून १८ टक्क्यांपर्यंत वाढल्यामुळे पुस्तकांच्या किंमतींमध्ये १५ ते २० टक्क्यांची वाढ झाली आहे. या वाढीचा परिणाम थेट विद्यार्थी, पालक, लेखक, तसेच लघु आणि मध्यम प्रकाशन उद्योगांवर होत आहे. कोविडनंतर अजूनही सावरण्याच्या टप्प्यात असलेला प्रकाशन व्यवसाय या वाढलेल्या करामुळे पुन्हा संकटात सापडू शकतो, त्यामुळे जीएसटी वाढीचा पुनर्विचार करावा अशी विनंती करत आहे"

पत्रात त्यांनी पुढे म्हटलं की, “पुस्तके ही केवळ वस्तू नसून ती ज्ञान, शिक्षण आणि संस्कृतीचा पाया आहेत. अशा परिस्थितीत पुस्तकांवरील जीएसटी दर कमी करून पुन्हा १२ टक्क्यांवर आणावेत किंवा शैक्षणिक वापरासाठी असलेल्या कागद व पुस्तकांना करातून पूर्णतः सूट द्यावी. जीएसटी कमी केल्यास प्रकाशन व मुद्रण उद्योगाला पुनरुज्जीवन मिळेल, पुस्तके व शैक्षणिक साहित्य सर्वांसाठी परवडणारे राहतील आणि 'विकसित भारत' या ज्ञानाधिष्ठित ध्येयाला चालना मिळेल, असं या पत्रात नमूद करण्यात आलं आहे. शिक्षण आणि प्रकाशन क्षेत्र ही ज्ञानाधारित समाजाची दोन महत्त्वाची स्तंभ आहेत. या क्षेत्रावर वाढत्या कराचा बोजा नको, अशी विनंती मोहोळ यांनी पत्रात केली आहे.