मुळशी धरणाचे पाणी पुण्याला मिळणार नाही : जयंत पाटील यांची स्पष्टोक्ती

मुंबई : पुणे जिल्ह्यातील (Pune District) मावळ व मुळशी तालुक्यातील विविध धरणांच्या प्रश्नांविषयी विधानसभेत लक्षवेधी आज मांडली गेली. टाटा कंपनीच्या (Tata Power) ताब्यातील धरणांचे पाणी हे पश्चिमकडे वळविण्यात आले असून ते पाणी पुणे शहराला आणि जिल्ह्याला मिळावे, अशी आग्रही मागणी आमदार राहुल कुल (Rahul Kul), सिद्धार्थ शिरोळे (Siddharth Shirole) यांनी केली. तुळजापूरचे आमदार राणा जगजितसिंह यांनीही हे पाणी मराठवाड्याला उपयोगी पडणार असल्याचे स्पष्ट केले.

या लक्षवेधीवर जलसंपदा जयंत पाटील यांनी उत्तर देताना ही पाणी पुन्हा पूर्वेकडे वळविणे आता शक्य नाही. मागील सरकारच्या काळात भावे समिती नेमली होती. या समितीने असा अहवाल दिला होता. या समितीच्या म्हणण्यानुसार १९२०-३० सालादरम्यान पुणे जिल्ह्यातील या धरणांचे पाणी खाली कोकणात वळवून वीज निर्मिती सुरू केली होती. आधीच ४२.६० टीएमसी पाणी धरणातून खाली उतरवून वीज निर्मिती होत असल्याने पाण्याला पुन्हा पूर्वेकडे वळवू नये. या समितीने असेही सुचवले आहे की. या धरणाच्या खाली जे पाणी गेले आहे त्या पाण्याचाही वापर सुनिश्चित झाला आहे.

या पाण्यासाठी ऑगस्ट २०१९ मध्ये देखील सुर्वे समिती स्थापन करून ६ बैठका घेण्यात आल्या. या समितीच्या म्हणण्यानुसार कृष्णेच्या पाणीवाटपासाठीचा दुसरा लवाद जाहीर झाला आहे. मात्र तो नोटीफाय झालेला नाही. नोटीफाय झाल्याशिवाय जर निर्णय घेतला गेला तर त्याचा परिणाम लवादाच्या निर्णयावर होऊ शकतो. त्यामुळे नोटीफाय झाल्यानंतर त्याबद्दल विचार करावा, अशी माहिती त्यांनी दिली.

पुणे शहराच्या पाण्याचा विषयही यावेळी उपस्थित केला गेला. पुणे शहराला ११.५ टीएमसी पाणी देणे अभिप्रेत आहे. पण शहरात २२-२३ टीएमसी पाण्याचा वापर आहे. पुणे हे महत्त्वाचे शहर आहे. त्यामुळे शहराला पाण्याचे निर्बंध घालणे योग्य नाही, असे ते म्हणाले.

मात्र पाण्याचा पुनर्वापर मनपाने करायला हवा. ५ वर्षे मनपाला संधी होती, मात्र यात हे काम गेले नाही. येत्या काळात उपमुख्यमंत्री ना. अजितदादा पवार यांच्या नेतृत्वाखाली पुणे शहर ही कामगिरी करेल, असा विश्वास जयंत पाटील यांनी व्यक्त केला.