PCMC Nivadnuk: राष्ट्रवादी काँग्रेस उमेदवाराच्या घरावर दगडफेक! भाजप कार्यकर्त्यांवर संशय

महापालिका निवडणुकीच्या प्रचाराची मुदत उद्या (मंगळवारी) संपत आहे. त्यासाठी पिंपरी-चिंचवडमध्ये राष्ट्रवादी काँग्रेसच्या महिला उमेदवारांच्या घरावर दगडफेक करण्यात आल्याची माहिती समोर येत आहे. या हल्ल्यामागे भाजप कार्यकर्त्यांचा हात असल्याचा संशय राष्ट्रवादी काँग्रेसच्या नेत्यांनी व्यक्त केला आहे. महिलांना शिवीगाळ करण्यात आली आहे.

राष्ट्रवादी काँग्रेसच्या अधिकृत उमेदवार प्रियंका कुदळे यांच्या घरावर काल रविवारी मध्यरात्री अज्ञात व्यक्तींनी हल्ला करण्याच्या प्रयत्न केला. कुदळे यांच्या घरावर काही जणांनी दगडफेक केली. या घटनेनंतर प्रियंका सुनील कुदळे यांनी पोलिसाकडे तक्रार केली होती. पोलिसांनी या प्रकरणी गुन्हा दाखल करण्यात आला आहे. परिसरात तणावपूर्ण शांतता आहे.

प्रियांका या प्रभाग क्रमांक 21 मधून निवडणूक लढवत आहे. स्थानिक महिलांनी मध्यस्थी करीत भाजप कार्यकर्त्यांना विरोध केला आहे. याठिकाणी मोठा पोलिस फौजफाटा दाखल करण्यात आला आहे. राष्ट्रवादी काँग्रेस पक्षाचे पॅनल प्रमुख संदीप वाघेरे यांनी हा प्रभाग संवेदनशील घोषित करण्याची मागणी महापालिका आणि पोलिस आयुक्तांकडे केली होती.

काल (रविवारी) नंदुरबार नगर परिषदेच्या उपाध्यक्ष निवडीच्या वादातून मुख्यमंत्री एकनाथ शिंदे यांच्या शिवसेनेचे माजी आमदार शिरीष चौधरी यांच्या घरावर अज्ञात जमावाने भीषण हल्ला केला. या दगडफेकीत चौधरी यांच्या घराच्या खिडक्यांच्या काचा फुटून मोठे नुकसान झाले. हल्लेखोरांनी उभ्या गाड्या पेटवून देण्याचाही प्रयत्न केला.

नंदुरबार नगर परिषदेच्या उपनगराध्यक्षपदी शिरीष चौधरी यांचे सुपुत्र प्रथमेश चौधरी यांची निवड झाली आहे. या निवडीनंतर दुपारी शहरात किरकोळ वाद झाला होता, ज्याचे रूपांतर रात्री हिंसक हल्ल्यात झाले. घटनेनंतर परिसरात मोठा पोलीस बंदोबस्त तैनात करण्यात आला होता.