PMC Election : पुण्यातील भाजप-शिवसेना युतीवर मुंबईत शिक्कामोर्तब? CM फडणवीस अन् उदय सामंतांनी फिरवला अंतिम हात; गणेश बिडकरांची पोस्ट चर्चेत

PMC Election News : पुणे महापालिका निवडणुकीसाठी भाजप आणि शिवसेनेच्या युतीवर जवळपास शिक्कामोर्तब झाले आहे. पुढील काही तासांत या युतीची आणि दोन्ही पक्षांमधील जागा वाटपाची घोषणा होण्याची शक्यता आहे. पुणे भाजपचे निवडणूक प्रमुख गणेश बिडकर यांनी नुकताच एक फोटो पोस्ट केला असून यामध्ये मुख्यमंत्री देवेंद्र फडणवीस, मंत्री उदय सामंत आणि स्वतः गणेश बिडकर यांची उपस्थिती दिसून येत आहे. मुख्यमंत्री फडणवीस आणि मंत्री सामंत यांनी या युतीला या युतीला मूर्त स्वरुप दिले असल्याची माहिती आहे.

गणेश बिडकर यांनी पोस्ट केलेल्या फोटोमध्ये मुख्यमंत्री देवेंद्र फडणवीस हे उदय सामंत यांना वाढदिवसाच्या शुभेच्छा देताना दिसत आहेत, यावेळी गणेश बिडकर आणि शिवसेनेचे नेते राहुल शेवाळे यांची उपस्थिती दिसत आहे. उदय सामंत यांच्याकडे शिवसेनेची पुण्याची जबाबदारी आहे. तर राहुल शेवाळे हे मुंबईसाठी युतीच्या चर्चेत महत्वाची भूमिका बजावत आहेत आणि गणेश बिडकर हे भाजपकडून पुण्यासाठी युतीची चर्चा करत आहेत. या फोटोमुळे मुंबईत युतीसाठी चर्चा झाल्याचे स्पष्ट होत आहे.

गुरुवारी दुपारी आमदार नीलम गोऱ्हे यांची भेट घेतल्यानंतर बिडकर हे मुंबईला रवाना झाले होते. त्यामुळे आता युतीची अंतिम चर्चा ही मुंबईत स्वतः देवेंद्र फडणवीस यांच्या उपस्थितीत होताना दिसत आहे. युतीच्या कोणत्या फॉर्म्युलावर शिक्कामोर्तब होणार हे आता अवघ्या काही तासातच स्पष्ट होईल असे या फोटोवरून दिसत आहे. मुख्यमंत्री फडणवीस आणि मंत्री सामंत यांच्या चर्चेनंतर शिवसेनेची जागा वाटपाबद्दलची नाराजी देखील दूर झाली असल्याचे सांगितले जाते.

भाजपची पहिली उमेदवार यादी तयार?

मिळालेल्या माहितीनुसार, भाजपची पुण्यातील 62 उमेदवारांची पहिली यादीही तयार झाली आहे. शुक्रवारी रात्रीपर्यंत ही यादी जाहीर होणार आहे. भाजपने (BJP) मागील महापालिका निवडणुकीमध्ये ज्या 99 जागा जिंकल्या होत्या त्यातील 62 जागांची ही यादी असणार आहे.

भाजपसाठी जिंकण्याची सर्वाधिक शक्यता असलेल्या या जागांचा असल्याचे सांगितले जाते. यामधील बहुतांश उमेदवार हे माजी नगरसेवक असणार आहेत. अन्य जागांवरही लवकरच निर्णय होऊन शिवसेनेला (Shivsena) जागा सोडल्यानंतर इथल्या उमेदवारांची घोषणा होण्याची शक्यता आहे.