Pune Traffic News : पुणेकरांसाठी महत्त्वाची बातमी; नऱ्हे ते देहूरोड महामार्गावरील कोंडी फोडण्यासाठी गडकरींचा 6 हजार कोटींचा 'मेगाप्लॅन'

Pune News : पुणे शहरालगतची वाहतूककोंडी फोडण्यासाठी मोठा निर्णय घेण्यात आला आहे. सिंहगड रोड, नऱ्हे, आंबेगाव परिसरातून अनेक जण हिंजवडी परिसरातील आयटी कंपन्यांमध्ये कामानिमित्त जातात. या नागरिकांना तासन् तास वाहतूक कोंडीमध्ये अडकून राहावं लागत आहे. तसेच पुण्याहून मुंबईला निघालेल्या नागरिकांना देखील या वाहतूक कोंडीचा मोठ्या प्रमाणात मनस्ताप सहन करावा लागतो. त्यांना आता दिलासा मिळणार आहे.

वाहतूक कोंडी कमी करण्याच्या दृष्टिकोनातून केंद्र शासनाने सहा हजार कोटी रुपये खर्चून एक मोठा प्रकल्प हाती घेण्याचा निर्णय घेण्यात आला आहे. या प्रकल्पाला केंद्रीय रस्ते वाहतूक मंत्री नितीन गडकरी यांची मंजुरी मिळाली असल्याची माहिती खासदार सुप्रिया सुळे यांनी दिली आहे.

सुप्रिया सुळे म्हणाल्या, पुणे आणि पिंपरी-चिंचवड परिसरातील वाहतूक जलद होण्यासाठी आवश्यक असणाऱ्या अंदाजे सहा हजार कोटी रुपयांच्या नऱ्हे ते देहूरोड दरम्यानच्या एलिव्हेटेड कॉरीडॉरला केंद्रीय रस्ते व महामार्ग मंत्री नितीन गडकरी यांनी मंजूरी दिली आहे.

आता हा प्रकल्प लवकरच केंद्रीय मंत्रिमंडळासमोर अंतिम मंजुरीसाठी सादर करण्यात येईल. शहराच्या परिसरातून जाणारी नऱ्हे - नवले पूल ते वारजे आणि चांदनी चौक ते रावेत दरम्यानची पुणे-बंगळुरू महामार्गावरील वाहतूक जलद व वाहतूककोंडीमुक्त होण्याच्या दृष्टीने या रस्त्याची नितांत आवश्यकता आहे, असे खासदार सुळे यांनी सांगितले.

हा प्रकल्प दोन टप्प्यात होणे प्रस्तावित असून पहिला टप्पा देहू रोड-पाषाण-सूस तर दुसरा टप्पा पाषाण-सूस-नऱ्हे असा असणार आहे. या अतिशय महत्त्वपूर्ण प्रकल्पास मंजूरी दिल्याबद्दल खासदार सुळे यांनी नितीन गडकरींचे आभार मानले आहेत. त्याचप्रमाणे हडपसर ते यवत या मार्गावर देखील होणाऱ्या एलिव्हेटेड कॉरीडॉर उभारण्याबाबतच्या कामालाही गती द्यावी, जेणेकरून या भागातील वाहतूक कोंडीतून नागरिकांची सुटका होईल, अशी मागणी सुप्रिया सुळे यांनी केली आहे.