une News : राज्यात महायुतीचे सरकार स्थापन झाले आहे. त्यानंतर आता मंत्रिमंडळाच्या खाते वाटपावरून चर्चा सुरू आहे. एकीकडे खाते वाटपावरून महायुतीच्या मित्र पक्षांमध्ये रस्सीखेच सुरू असताना दुसरीकडे मात्र पुण्याच्या पालकमंत्री पदावरून दावे प्रतिदावे होऊ लागले आहेत.
पुणे जिल्ह्यातील महायुतीच्या नवनिर्वाचित आमदारांपैकी किती जणांची मंत्रिपदावर वर्णी लागणार आणि पुणे जिल्ह्याच्या वाट्याला किती कॅबिनेट मंत्रीपद येणार या चर्चांपेक्षा पुण्याच्या पालकमंत्री पदी नेमकं कोण विराजमान होणार याच्यात सर्वाधिक चर्चा सध्या पुण्याच्या राजकीय वर्तुळात पाहायला मिळत आहे.
एकीकडे अजित पवारांच्या राष्ट्रवादीकडून अजित पवार हेच पुण्याचे पालकमंत्री असतील याबाबत विश्वास व्यक्त करण्यात येत आहे. दुसरीकडे भाजपचे नेते मंडळी आता एका फॉर्मुल्याच्या आधाराने भाजपाचा पुणे जिल्ह्यात पालकमंत्री होईल असा दावा करत आहेत.
सध्या पुणे जिल्ह्यातील 21 आमदारांपैकी सर्वाधिक नऊ आमदार हे भाजपचे आहेत. त्यामुळे ज्याचे जास्त आमदार त्याचाच पालकमंत्री या सूत्राच्या हवालाने भाजपाचा पुणे जिल्ह्यात पालकमंत्री भाजपाचा असावा, असा आग्रह आमदार आणि भाजपच्या पदाधिकाऱ्यांनी कार्यकर्त्यांनी धरला आहे.
पुणे जिल्ह्याचे सध्याचे चित्र पाहिल्यास 21 विधानसभा मतदारसंघांपैकी 9 ठिकाणी भाजपचे तर अजित पवारांच्या राष्ट्रवादीचे 8 ठिकाणी आमदार निवडून आले आहेत. शिंदेंच्या शिवसेनेचे आमदार 1, शिवसेना उद्धव बाळासाहेब ठाकरे पक्षाचा 1, अपक्ष एक आणि 1 राष्ट्रवादी काँग्रेस शरदचंद्र पवार पक्षाचा आमदार आहे. त्यामुळे सध्या जिल्ह्यामध्ये भाजप पेक्षा राष्ट्रवादी काँग्रेसचा एक आमदार कमी आहे.
मागील महायुती सरकारमध्ये पुण्याचे पालकमंत्री पद हे भाजपकडे होते. मात्र जेव्हा अजित पवारांच्या राष्ट्रवादीने महायुतीत प्रवेश केला त्यानंतर हे पालकमंत्रीपद अजित पवारांकडे गेले. मात्र त्यावेळी जिल्ह्यामध्ये भाजपपेक्षा राष्ट्रवादी काँग्रेसचे आमदार जास्त होते. त्यामुळे राष्ट्रवादीचा पालकमंत्री करण्यात आला. मात्र सध्या भाजप हा जिल्हा सर्वाधिक मोठा पक्ष असल्याने आता भाजपाचाच पालकमंत्री व्हावा, असा आग्रह भाजपच्या आमदारांनी आणि नेत्यांनी धरला आहे.
मागील महायुती सरकारमध्ये अजित पवार महायुतीतील इतर घटक पक्षांच्या प्रतिनिधींना निधी देताना आखडता हात घेतात, असे आरोप सातत्याने भाजप आणि शिंदे सेनेचे नेते करत होते. डीपीडीसीच्या निधी वाटपावरून देखील अनेकदा भाजप आणि राष्ट्रवादीच्या नेत्यांमध्ये खटके उडाले. त्यामुळे मंत्रिपदाचा विस्तार होण्यापूर्वीच भाजप कार्यकर्ते सतर्क झाले आहेत आणि पुण्याचा पालकमंत्री म्हणून चंद्रकांत पाटील यांची नियुक्ती व्हावी, अशी मागणी करत आहेत. परंतु अजित पवार पुण्याच्या पालकमंत्रिपदाचा दावा सोडतील का, हे बघावे लागेल.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.