Pune APMC News: पुणे बाजार समिती; सभापतीपदी दिलीप काळभोर, तर उपसभापतीपदी रवींद्र कंद !

Pune Market commitee News : पुणे कृषी उत्पन्न बाजार समितीच्या निवडणुकीत सर्वपक्षीय पॅनेलने, राष्ट्रवादी काँग्रेस (NCP) पुरस्कृत पॅनेलचा पराभव केला होता. यानंतर आज सभापती व उपसभापती यांची निवड करण्यात आली. सभापतीपदी दिलीप काशिनाथ काळभोर यांची, तर उपसभापतीपदी रवींद्र नारायण कंद यांची बिनविरोध एकमताने निवड करण्यात आली. यात विशेष बाब म्हणजे काळभोर यांची दुसऱ्यांदा सभापतीपदी निवड झाली आहे.

सभापती आणि उपसभापतीपदी निवड करण्यासाठी पुणे कृषी बाजार समितीच्या मार्केटयार्ड येथील कार्यालयात सर्वच नव्याने निवडून आलेल्या सभासदांची बैठक आयोजित करण्यात आली होती. ग्रामीण जिल्हा उपनिबंधक व निवडणूक निर्णय अधिकारी प्रकाश जगताप यांच्या नेतृत्वाखाली निवड पार पडली. सभापती आणि उपसभापतीपदासाठी असे दोनच अर्ज दाखल झाले होते. दिलीप काळभोर आणि रवींद्र कंद केवळ यांचेच उमेदवारी अर्ज दाखल झाले होते. त्यानुसार, निवडणूक निर्णय अधिकारी प्रकाश जगताप यांनी ही निवड केली.

निवडणूक निर्णय अधिकारी प्रकाश जगताप यांनी सभापतीपदी तर दिलीप काळभोर आणि उपसभापती रवींद्र कंद यांची बिनविरोध निवड केली. पुणे जिल्हा मध्यवर्ती सहकारी बॅंकेचे संचालक प्रदीप कंद, संचालक विकास दांगट, बाजार समितीचे संचालक रोहिदास उंद्रे, प्रशांत काळभोर, सुदर्शन चौधरी तसेच, यावेळी उपस्थित होते.

पुण्याच्या कृषी उत्पन्न बाजार समितीच्या संचालक मंडळाच्या अठरा जागांसाठी नुकतीच निवडणूक पार पडली होती. या निवडणुकीमध्ये भारतीय जनता पक्षाचे नेते प्रदीप कंद आणि पुणे जिल्हा मध्यवर्ती सहकारी बँकेचे संचालक विकास दांगट या दोघांच्या नेतृत्वाखाली सर्वपक्षीय नेत्यांचे शेतकरी विकास आघाडी पॅनेलने एकूण १३ जागांवर विजय मिळवला.

तर राष्ट्रवादी काँग्रेस प्रणित पॅनेलचे केवळ दोनच उमेदवारांना विजय मिळवता आला होता. व्यापारी - अडते आणि हमाल - मापाडी गटातून तीन उमेदवार निवडून आले होते. तर व्यापारी अडते मतदारसंघातून गणेश घुले, तसेच अनिरुद्ध भोसले, हमाल मापाडीच्या वर्गातून संतोष नांगरे यांची संचालकपदी निवड करण्यात आली होती. (Political Web Stories)