Pune Revenue Officers Party : बावनकुळेंच्या खात्यातील अधिकाऱ्यांची 'अनधिकृत रिसॉर्ट'मध्ये पार्टी; वडेट्टीवारांचं ट्विट, आता अद्दल घडणार?

Mumbai News : भाजप प्रदेशाध्यक्ष तथा मंत्री चंद्रशेखर बावनकुळे यांच्या महसूल खात्याचे अधिकारी अनधिकृत रिसॉर्टमध्ये कशी पार्टी करतात, यावर काँग्रेस नेते विजय वडेट्टीवार यांनी निशाणा साधला आहे.

विजय वडेट्टीवार यांनी त्यांच्या 'एक्स' खात्यावर पार्टीचे व्हिडिओ शेअर करत महसूल मंत्र्यांच्या खात्यात काय सुरू आहे, याकडे लक्ष आहे का? असा प्रश्न विचारला आहे. यावर मंत्री बावनकुळे यांनी देखील प्राथमिक माहिती घेतली असून, दोषींवर कारवाई होईल, असे संकेत दिले आहेत.

अनधिकृत रिसॉर्टवर महसूल अधिकाऱ्यांची पार्टी? जनता करत भरते, महसूल अधिकारी अनधिकृत रिसॉर्टवर मौज करतात!, असे म्हणत पुण्यातील खेडमधील एका अनधिकृत रिसॉर्टमध्ये ही पार्टी झाल्याचा दावा करणारे ट्विट काँग्रेसचे (Congress) विजय वडेट्टीवार यांनी त्यांच्या एक्स खात्यावर व्हिडिओसह पोस्ट केले आहे.

पुण्यातील (Pune) खेडमध्ये महसूल विभागाच्या अधिकाऱ्यांची पार्टी रंगली, त्यात उपविभागीय अधिकारी, उपजिल्हाधिकारी अनिल दौंडे आणि तहसीलदार ज्योती देवरे डान्स करत सहभागी झाले. ही पार्टी ज्या रिसॉर्टमध्ये झाली, ते रिसॉर्टच अनधिकृत असल्याचा आरोप आहे! असे विजय वडेट्टीवार यांनी म्हटले आहे.

एकीकडे सामान्य नागरिकांवर लहानसहान कारणांसाठी कारवाई केली जाते, अनधिकृत बांधकामे तोडली जातात, तर दुसरीकडे महसूल अधिकारीच अनधिकृत रिसॉर्टवर मजा करत आहेत. महसूल मंत्र्यांच्या खात्यात काय सुरू आहे, याकडे लक्ष आहे का?, असा सवाल विजय वडेट्टीवार यांनी केला आहे.

महसूलमंत्री चंद्रशेखर बावनकुळे यांनी याची दखल घेतली असून, त्यावर प्रतिक्रिया दिली आहे. "या पार्टीची माहिती मिळाली आहे. प्राथमिक अहवालानुसार ते रिसॉर्ट अनधिकृत असल्याची देखील माहिती मिळते. यात अधिकारी दोषी असतील, तर त्यांच्यावर खात्यामार्फत चौकशी होऊन कारवाई होईल", असे महसूलमंत्री बावनकुळे यांनी म्हटले आहे.