MNS Politics : 'लाव रे तो व्हिडिओ, नव्हे काढ रे तो फोटो'; राज ठाकरेंनी पुण्यात राबवला नवा पॅटर्न!

Pune News, 24 Aug : आगामी स्थानिक स्वराज्य संस्थांच्या निवडणुकांसाठी सर्वच राजकीय पक्षांनी आपली कंबर कसली आहे. प्रारूप प्रभाग रचना जाहीर झाल्यानंतर आता तयारीला वेग आला आहे. अशातच मनसे अध्यक्ष राज ठाकरे यांनी पुणे दौरा करत पदाधिकाऱ्यांना महापालिका निवडणुकीसाठी सज्ज राहण्याच्या सूचना करत तयारीला लागण्याचे आदेश दिलेत.

राज ठाकरे यांनी पुण्यातील प्रमुख पदाधिकाऱ्यांची शनिवारी बैठक घेतली. या बैठकी दरम्यान त्यांनी विचारलं की मला अत्यंत प्रामाणिकपणे तुम्हाला विचारायचं आहे की आगामी महापालिका निवडणुका लढवण्यास कोणकोण इच्छुक आहेत. जे जे इच्छुक आहेत त्यांनी हात वर करा लाजायचं काही कारण नाही.

ठाकरेंच्या आहवानानंतर उपस्थितांमधील अनेकांनी हात उंचावले. मात्र हात उंचवणाऱ्यांची संख्या उपस्थितांच्या तुलनेत काही प्रमाणात कमी होती. त्यामुळे ज्यांनी हात वर केले नव्हते त्यांना उद्देशून राज ठाकरेंनी तुम्ही नक्की आगामी महापालिका निवडणुकांसाठी इच्छुक नाही आहेत ना? असा सवाल केला.

तसेच ते म्हणाले, 'मी पुन्हा एकदा विचारतोय कोण इच्छुक असतील त्यांनी हात वर करा,'असं सांगत राज ठाकरे यांनी आपल्या स्वीय सहाय्यकाला फोन आणण्यास सांगितलं आणि म्हणाले, "आता फोन आल्यावर ती कसे पटापट हात वर येतील ते पहा", आणि त्यानंतर राज ठाकरेंनी हात वर केलेल्या पदाधिकाऱ्यांचे फोटो काढून घेतले.

तेव्हा काही वरिष्ठ पदाधिकाऱ्यांनी हात वर केले नव्हते त्यांना पुन्हा एकदा राज ठाकरे यांनी 'तुम्ही इच्छुक नाहीयेत का?' असं विचारलं त्यानंतर त्यातीलही काही लोकांनी हात वर केले. ठाकरे म्हणाले, "मला मी आत्ताच तुम्हाला हात वर करायला सांगितले आहेत. आता हात वर केलेले नसले तर नंतर माझ्याकडे तिकीट मागायला यायचं नाही. मी हे गमतीने म्हणत नाहीये."

त्यानंतर राज ठाकरेंच्या पीएने सभागृहातील सर्व बाजूची फोटो काढण्यास सुरुवात केली. तेव्हा काही लोकांनी बाल्कनी मधले देखील फोटो काढा असं सांगितलं. त्यानंतर राज ठाकरे यांनी बाल्कनीमधील फोटो आलेत असं सांगितलं. राज ठाकरे यांचा हा बाणा बघून बहुतांश पदाधिकाऱ्यांनी आपले हात वर केले असल्याचे पाहायला मिळालं.

या बैठकीत झालेल्या या घटनेमुळे आगामी महापालिका निवडणुकीसाठी राज ठाकरे यांचा 'काढ रे तो फोटो' हा नवीनच पॅटर्न पाहायला मिळाला. याच पद्धतीने आगामी काळात इच्छुकांना तिकीट वाटप करण्यात येणार का? असा देखील राजकीय वर्तुळात सुरू झाले आहेत.