Trupti Desai: रुपालीताई नटतात, मटकतात... तुम्ही का जळता? चाकणकरांसाठी तृप्ती देसाई मैदानात

Pune, 11 March 2025 : राष्ट्रवादी काँग्रेस शरदचंद्र पवार पक्षाच्या महिला संघटनेच्या प्रदेशाध्यक्ष रोहिणी खडसे यांनी महिला आयोगाच्या अध्यक्षा रूपाली चाकणकर यांच्यावर पुण्यातील आंदोलनादरम्यान जोरदार निशाणा साधला. चांगला मेकअप करून पक्षाच्या कार्यक्रमात मटकायचे एवढेच काम महिला आयोगाच्या अध्यक्षा करीत असल्याची टीका रोहिणी खडसे यांनी केली होती. या टिकेनंतर आता रूपाली चाकणकर यांच्या बाजूने भूमाता ब्रिगेडच्या तृप्ती देसाई मैदानात उतरल्या आहेत.

तृप्ती देसाई म्हणाल्या,'महिला आयोगाच्या अध्यक्षा रूपाली चाकणकर यांच्या कार्यपद्धतीबाबत मी सातत्याने टीका केली आहे. स्वारगेट प्रकरणावरून देखील त्यांच्यावर आम्ही टीका केली होती. मात्र रोहिणी खडसे पुणे दौरा वर असताना त्यांनी रूपाली चाकणकर यांच्यावर टीका करतान चाकणकर या फक्त मेकअप करतात आणि इकडे तिकडे मटकतात, असं वक्तव्य केले आहे.

नुकताच महिला दिन साजरा करण्यात आला. रोहिणी खडसे या एका पक्षाच्या महिला प्रदेशाध्यक्ष आहेत. त्यामुळे रूपाली चाकणकर यांनी कामांमध्ये कोणती चुकी केल्यास त्यांच्यावर टीका करण्याचं आपल्याला अधिकार आहे. मात्र त्यांना चांगल्या साड्या घालायला मेकअप करायला आवडत असेल तर तो त्यांचा अभिव्यक्ती स्वातंत्र्याचा भाग आहे. त्यामुळे आपण चाकणकर यांच्यावर टीका करताना त्यांच्या कामाचा बाबतीत बोलायचं सोडून त्यांच्या जीवनशैलीवर टीका करतो हे अत्यंत चुकीचा आहे.

यापूर्वीही चाकणकर यांच्यावरती शोभेच्या बाहुल्या पासून ते त्यांच्या चपला आणि साड्यांवर देखील टीका झालेली आहे. त्यांच्या कामाच्या बाबतीत निश्चितच टीका झाली पाहिजे. मात्र त्यांना टापटीप राहायला आवडत असेल त्यांना रोज मेकअप करायला आवडत असेल तर तो त्यांच्या अभिव्यक्ती स्वातंत्र्याचा भाग असून त्याबाबत टीका करणे अत्यंत चुकीचे असल्याचे तृप्ती देसाई म्हणाल्या.

राजकारणामध्ये दुसऱ्या महिला जर चांगल्या राहत असतील तर आपण त्या महिलेवर का जळतोय? असा सवाल तृप्ती देसाई यांनी रोहिणी खडसे यांना केला. राजकीय जीवनामध्ये असलेल्या महिलांनी इतर महिलांवर टीका करीत असताना त्यांच्या चारित्र्याविषयी त्यांच्या राहण्याविषयी आणि वैयक्तिक आयुष्य बाबत टीका न करता फक्त कामावर बाबत टीका करावी, असं तृप्ती देसाई म्हणाल्या.