Pune News : राष्ट्रवादी काँग्रेस शरदचंद्र पवार पक्षामध्ये सध्या संघटनात्मक बदलाचे वारे वाहताना पाहायला मिळत आहेत. प्रदेशाध्यक्षपदी शशिकांत शिंदे यांची नियुक्ती झाल्यानंतर गेल्या काही दिवसांपासून संघटनात्मक बैठकांचे सत्र सुरू झाले आहे.
अशातच पुणे महापालिका निवडणुकीच्या दृष्टिकोनातून शहरातील पदाधिकाऱ्यांची बैठक नुकतीच झाली. बैठकीमध्ये खासदार सुप्रिया सुळे यांनी पदाधिकाऱ्यांना मार्गदर्शन केलं. शहराध्यक्ष प्रशांत जगताप, वडगाव शेरी विधानसभा मतदारसंघाचे आमदार बापूसाहेब पठारे, माजी खासदार अ‍ॅड. वंदना चव्हाण, माजी आमदार जयदेव गायकवाड, कमल ढोले पाटील, अंकुश काकडे, अश्विनी कदम, सचिन दोडके यांच्यासह माजी नगरसेवक उपस्थित होते.
बैठकीमध्ये सुप्रिया सुळे यांनी मार्गदर्शन करताना आगामी पुणे महापालिकेच्या निवडणुकीमध्ये आपल्याला उपमुख्यमंत्री अजित पवार यांच्या राष्ट्रवादीच्या एक पाऊल पुढे राहायचं असून निवडणुकीत आपल्या पक्षाचे नगरसेवक हे दादांच्या पक्षाच्या नगरसेवकांच्या पेक्षा जास्तच असले पाहिजेत, असे सांगत सुप्रिया सुळे यांनी महापालिका निवडणुकीसाठी आक्रमक पवित्रा घेतला आहे. त्यामुळे पुणे महापालिकेच्या निवडणुकीत दोन्ही राष्ट्रवादी काँग्रेस स्पर्धक म्हणून आमने सामने येऊन भिडणार असल्याचं स्पष्ट होत आहे.
बैठकी दरम्यान महापालिका निवडणुकीच्या तयारीचा आढावा सुप्रिया सुळे यांनी घेतला. यावेळी त्यांनी महाविकास आघाडीच्या माध्यमातून एकत्रितपणे निवडणूक लढवण्याची तयारी असल्याचे स्पष्ट केले. मात्र, शिवसेना उद्धव बाळासाहेब ठाकरे पक्षाने मनसेसोबत निवडणूक लढवण्याची तयारी सुरू केली आहे. त्यामुळे काँग्रेससोबत एकत्र राहून निवडणूक लढावी लागू शकते. यासाठी सर्वांनी तयारी करावी आणि आपल्या पक्षाचे जास्तीत जास्त नगरसेवक निवडून आणण्यासाठी प्रयत्न करावेत, असे निर्देश त्यांनी दिल्याचे पवार गटाच्या पदाधिकाऱ्यांनी सांगितले.
2029 मध्ये होणाऱ्या लोकसभा आणि विधानसभा निवडणुकांपूर्वी मतदारसंघांच्या रचनेत बदल होणार असून, यासंदर्भातील अधिसूचना पुढील दोन ते तीन महिन्यांत जारी होईल, अशी माहिती खासदार सुळे यांनी बैठकीत दिली. 'एक देश, एक निवडणूक' धोरणानुसार 2028 मध्ये लोकसभा आणि विधानसभेच्या निवडणुका एकत्र होण्याची शक्यता आहे, असेही त्यांनी नमूद केल्याचे सांगण्यात आले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.