अजितदादांच्या उपस्थितीत होणाऱ्या 'सारथी'च्या बैठकीला शरद पवारांची अचानक हजेरी

पुणे : छत्रपती शाहू महाराज संशोधन, प्रशिक्षण व मानव विकास संस्थेच्या (सारथी) नवीन इमारतीचे सादरीकरण व इतर महत्वाच्या मुद्यांवर शुक्रवारी उपमुख्यमंत्री अजित पवार यांच्या मुख्य उपस्थितीत बैठकीचे नियोजन होते. पण विधान भवन येथे होणाऱ्या या बैठकीत राष्ट्रवादी काँग्रेसचे अध्यक्ष शरद पवार यांनी अचानक हजेरी लावली. या बैठकीत पूर्णवेळ थांबून त्यांनी सारथीची इमारत व इतर बाबींविषयी माहिती जाणून घेतली.

सारथी संस्थेला हक्काची जागा मिळाली आहे. जागेचा प्रश्न मिटला असून संस्थेला शिवाजीनगर येथील गट क्रमांक 1737/1 मधील 4163 चौरस मीटर एवढी शासकीय जागा मिळाली आहे. या जागेवर संस्थेसाठी कार्यालय उभारले जाणार आहे. या प्रस्तावित इमारतीचे सादरीकरण बैठकीत करण्यात आले.

बैठकीला अजित पवार, सारथीचे अध्यक्ष अजित निंबाळकर, संचालक मधुकर कोकाटे, व्यवस्थापकीय संचालक अशोक काकडे आदी उपस्थित होते. शरद पवार यांनी या बैठकीबाबत ट्विटरवरून माहिती दिली आहे. 'उपमुख्यमंत्री अजित पवार यांच्या उपस्थितीत पुण्यात झालेल्या बैठकीत ‘सारथी’ संस्थेच्या नवीन इमारतीविषयक सादरीकरण व इतर माहिती जाणून घेतली,' असं पवारांनी म्हटलं आहे.

राज्य शासनाने सारथी संस्थेला शिवाजीनगर, भांबुर्डा येथील शासकीय जागा कार्यालय बांधण्यासाठी प्रदान केली आहे. यामुळे आता सारथी संस्थेला हक्काची जागा उपलब्ध होणार आहे, असं पवार यांनी ट्विटमध्ये नमूद केलं आहे. शरद पवार यांनी बैठकीत अधिकाऱ्यांना आवश्यक सुचनाही केल्या.

सारथी संस्थेसंबंधित इतर प्रलंबित विषय त्वरीत मार्गी लावून तळागाळातील मराठा, मराठा-कुणबी, कुणबी-मराठा व कुणबी समुदायातील समाजासाठी सारथी संस्था पूर्ण क्षमतेने कार्यान्वित करावी, अशी सूचना बैठकीत केल्याची माहितीही शरद पवार यांनी ट्विटमध्ये दिली आहे.