Shirur News : भाजपने शिरूर लोकसभेवर दावा सांगितला तर तुम्ही काय करणार? ; आढळराव पाटील म्हणाले..

Pune News : शिरूर लोकसभा मतदारसंघाचे शिवसेनेकडून तीन वेळा खासदार राहिलेले शिवाजीराव आढळराव पाटील यांनी आगामी लोकसभा निवडणुकीबाबत भूमिका स्पष्ट केली आहे. मुख्यमंत्री एकनाथ शिंदे यांच्या शिवसनेत दाखल झाल्यानंतर खासदारकीसाठी ते पुन्हा इच्छुक आहेत, अशी चर्चा होती. मात्र शिरूरवर भाजपनेही दावा सांगितल्याची चर्चा होती. 'सरकारनामा'ने आढळराव पाटील यांची विशेष मुलाखत घेतली. यावेळी त्यांनी शिरूरबाबत आपली भूमिका स्पष्ट केली.

'सरकारनामा'ने आढळराव यांची विशेष मुलाखत घेतली. या मुलाखतीत त्यांनी आगामी निवडणुकीबाबत महत्त्वाचा खुलासा केला आहे. मुलाखतीत त्यांना प्रश्न विचारण्यात आला होता की, "आता तुम्ही एकनाथ शिंदेंसोबत आलात. भाजपने ही शिरूरवर लक्ष केंद्रीत केलेले आहे. यामध्ये लोकसभा निवडणुकीत तुमची अडचण होईल, असे वाटत नाही का? भाजपने शिरूरवर दावा केला तर तुम्ही काय करणार?" असा प्रश्न आढळरावांना विचारण्यात आला.

यावर उत्तर देताना आढळराव म्हणाले, "भाजपने शिरूरवर दावा केला, असा ठोस पुरावा नाही. चर्चा, अफवा या गोष्टी चालतच राहतात. ज्यावेळी आम्ही १३ खासदार शिंदेकडे गेले. त्या प्रक्रियेत मी सोबतच होतो. ज्या जागा शिवसेनेच्या आहेत, त्या लोकसभेच्या असो किंवा विधानसभेच्या त्या जागा शिवसेनेलाच मिळणार, त्या शिवसेनाच लढणार, हे ठरलं आहे."

पुढे आढळराव म्हणाले, 'मी शिंदेकडून कुठलाही शब्द घेतला नाही. कोणतीही अट ठेवली नाही. माझ्या दृष्टीने खासदार होणं एवढं महत्त्वाचं नाही. आज चार वर्षे झाले, खासदार नाही. तरी खासदारांपेक्षा जास्त कामे करतो. उद्धव ठाकरे यांच्या शिवसेनेतसुद्धा मला कुठे शब्द होता? मीच म्हणत होतो, कशाला राष्ट्रवादीबरोबर संघर्ष करताय," असे आढळराव म्हणाले.