Chinchwad : ठाकरे गटाच्या शहरप्रमुखावरील हल्ल्याला २०१७ च्या महापालिका निवडणुकीची पार्श्वभूमी

Sachin Bhosale : चिंचवड विधानसभा पोटनिवडणुकीतील आघाडीच्या उमेदवाराचा प्रचार करताना ठाकरे गटाचे पिंपरी-चिंचवड शहरप्रमुख अॅड. सचिन भोसले यांच्यावर बुधवारी (ता. २२) हल्ला झाला. तो २०१७ मधील पिंपरी-चिंचवड महापालिका निवडणुकीच्या वादातून झाल्याचे स्पष्ट झाले आहे. यातून आता परस्परविरोधी गुन्हे दाखल करण्यात आल्या आहेत.

भाजपकडूनही तक्रार आल्याने वाकड पोलिसांनी (Police) भोसलेंविरोधात आज गुन्हा दाखल केला. भोसलेंनी दिलेल्या तक्रारीनंतर भाजपच्या एका कार्यकर्त्यानेही भोसलेंविरोधात तक्रार दिली आहे. त्यात त्यांनी भोसलेंनीही आपल्याला मारहाण केल्याचे म्हटले आहे. त्यानंतर या प्रकरणी परस्परविरोधी गुन्हे दाखल करण्यात आलेले आहेत.

PCMC पिंपरी-चिंचवड महापालिकेच्या २०१७ मधील निवडणुकीत माने हे भोसलेंचे प्रभाग २४ मध्ये (थेरगाव) प्रतिस्पर्धी उमेदवार होते. त्यावेळी मानेंचा पराभव झाला होता. त्यामुळे त्यांची भोसलेंवर मोठी खुन्नस होती. त्यातूनच काल चिंचवडच्या पोटनिवडणुकीत भोसलेंवर माने व त्याच्या चार साथीदारांनी हल्ला केला. यात भोसले जखमी झाले आहेत.

दरम्यान, भोसलेंच्या फिर्यादीवरून दाखल गुन्ह्यात पोलिसांनी दोघांना अटक केली आहे. मात्र मुख्य आरोपी जयदीप माने व इतर दोन आरोपींना अटक झालेली नाही. त्याच्या निषेधार्थ आज माजी नगरसेवक अनंत कोराळेंनी पोलीस ठाण्यावर मोर्चा काढला होता. यावेळी फरार आरोपींना पकडण्याची मागणी करण्यात आली.

भोसलेंना संरक्षण देण्याची गोऱ्हेंची मागणी

भोसलेंच्या हल्लेखोरांना तात्काळ अटक करावी. आरोपींवर कडक कारवाई करावी, तसेच भोसलेंना पोलीस संरक्षण द्यावे, अशी सूचना विधानपरिषदेच्या उपसभापती डॉ. निलम गोऱ्हे (Nilam Gorhe) यांनी राज्याच्या पोलीस महासंचालकांना आज केली आहे. पुणे व पिंपरी चिंचवडमधील वाढत्या संघटित गुन्हेगारीस आगामी निवडणुकांच्या पार्श्वभूमीवर आवर घालण्याची निकड असल्याचेही पत्रात म्हटले. दरम्यान, गोऱ्हे यांनी सचिन भोसलेंची त्यांनी विचारपूस केली आहे.