Vasant More : मतभेदाचं रूपांतर मनभेदात; मोरेंनी मनातील खदखद व्यक्त करत नेत्यांची नावेच घेतली!

Vasant More : पुणे मनसेचे फायरब्रँड नेते वसंत मोरे यांनी आपल्याच पक्षातील नेत्यांकडून होणारी घुसमट सरकारनामाशी संवाद साधताना जाहीरपणे बोलून दाखवली. पक्षात आपल्याला एकटे पाडलं जात आहे. वसंत मोरे पक्षातून बाहेर पडावा यासाठी पक्षातल्याच नेते प्रयत्न करतायेत, अशी आपल्या मनातली खदखद ही त्यांनी व्यक्त केली. मात्र मनसे अध्यक्ष राज ठाकरे यांच्यावर आपली निष्ठा आहे, असेही ते म्हणाले.

वसंत मोरे म्हणाले, मी आणि माझ्या सहकाऱ्यांमध्ये मतभेद होते. २००७ पासूनच मी, किशोर शिंदे आणि बाबू वागस्कर पुणे सभागृहात होतो. २०१२ ला सुद्धा आम्ही तिघे सभागृहात होतो. माझी विरोधीपक्षनेतेपदी निवड झाली होती. यावेळी शिंदे आणि वागस्कर माझ्यासोबत काम करायचे. मधल्या काळात वागस्कर गटनेते झाले. आम्ही तिघेही गटनेते होतो. मी सर्वात जास्त काळ गटनेता राहिलो आहे. २०१७ ते २०२२ या कालावधीत मी एकटा निवडून आलो. वागस्कर आणि शिंदे यांचीसभागृहाशी नाळ तुटली. आमचा फार कमी संपर्क झाला.

"मागील तीन चार वर्षांमध्ये पुलाखालून बरचसं पाणी वाहून गेलं होतं. एकमेकांचे स्वभाव बदलले. काही विषयात आमचे कायम खटके उडायचे. वाद वाढत जाऊन, मतभेदाचं रूपांतर मनभेदात होऊ लागलं. पक्षात मला एकटं पाडण्यासाठी प्रयत्न होतायेत का? असं मला वाटायला लागलंय.अशी मनातली खदखद मोरेंनी सरकारनामाशी संवाद साधताना बोलून दाखवली.

बाबू वागस्कर यांनी माझ्याविषयी जे बोलले की, 'नक्की त्यांना इतर पक्षाकडून ऑफर का येत आहेत? हे तपासून पहा.' आता भाजपने आणि राष्ट्रवादीवाल्यांनी मला पत्र देऊन बोलवायचं का? मनसे अध्यक्ष राज ठाकरे यांच्यावर आपली निष्ठा आहे, ते पुण्यात आल्यावरच मी पक्ष कार्यालयातआवर्जून उपस्थित असतो, इतर वेळी आपण कार्यालयात जात नाही, असेही ते म्हणाले.