पाटील-परिचारकांविरोधात आता सर्वच निवडणुकांत महाडिकांचा उमेदवार असणार : महाडिकांचे आव्हान

पंढरपूर : माजी आमदार राजन पाटील (Rajan Patil) आणि प्रशांत परिचारक (Prashant Paricharak) हे मोहोळ व पंढरपूर तालुक्यातील ज्या निवडणुकांमध्ये असतील, त्या सर्वच ठिकाणी धनंजय महाडिकांचे पॅनेल अथवा उमेदवार असतील, असा गर्भित इशारा भाजप खासदार धनंजय महडिक (Dhananjay Mahadik) यांनी दिला आहे. (Against Patil-Paricharak, Mahadiks will now have candidates in all elections : Dhananjay Mahadiks' challenge)

खासदार धनंजय महाडिक आणि त्यांच्या कुटुंबीयांनी पुळूज मतदान केंद्रावर आज (ता. १३ नोव्हेंबर) मतदान केले. त्यानंतर पत्रकारांशी बोलताना खासदार महाडिक यांनी भीमा साखर कारखान्यासह पंढरपूर-मोहोळचे पुढील राजकारण, राजन पाटील यांचा भाजप प्रवेश यावर आपली भूमिका सडेतोडपणे मांडली.

महाडिक म्हणाले की, भीमा सहकारी साखर कारखान्याची दहा वर्षे सत्ता असूनही सोलापूर जिल्ह्याच्या राजकारणात मी सक्रीय होत नव्हतो. कारण, माझा मतदारसंघ कोल्हापूर आहे. कोल्हापूर जिल्ह्यातील सर्वच स्थानिक स्वराज्य संस्थांच्या निवडणुका आम्ही लढवत होतो. पण, भीमा सहकारी साखर कारखान्याची निवडणूक ज्या पद्धतीने आमच्यावर लादली आणि खालच्या पातळीवर जाऊन आरोप-प्रत्यारोप करत आहेत. त्यामुळे भविष्यात सोलापूर जिल्ह्यातील सर्व निवडणुकांमध्ये आमचा सहभाग असेल.

पंढरपूर आणि मोहोळ तालुक्यातील ज्या ज्या निवडणुकांत प्रशांत परिचारक व राजन पाटील असतील, त्या सर्वच ठिकाणी त्यांच्या विरोधात धनंजय महाडिकांचे पॅनेल अथवा उमेदवार भविष्यात निश्चित उभे राहतील, असे आव्हान महाडिकांनी पाटील-परिचारकांना दिले.

पश्चिम महाराष्ट्राचे लक्ष लागलेल्या भीमा साखर कारखान्याच्या निवडणुकीत खासदार धनंजय महाडिक यांना हॅटट्रिक करण्याचा विश्वास व्यक्त केला आहे. विरोधकांनी प्रचाराची पातळी सोडली , प्रचारातून दहशत आणि गुंडगिरीचा समर्थन केल्याने त्यांना मतदार नाकारातील आणि जनता हॅटट्रिक करण्याची संधी देईल असा विश्वास खासदार महाडिक यांनी व्यक्त केला.