ZP Election : मंत्री जयकुमार गोरेंच्या कट्टर विरोधकाने शड्डू ठोकलाच : भावाला ZP वर पाठवण्यासाठी लागणार वेगळी 'स्ट्रॅटेजी'

Satara ZP Politics : सातारा जिल्ह्यातील माण तालुक्यातील कुकुडवाड हा गट आमचा हक्काचा असून या गटातून 'देसाई' आडवानाचा उमेदवार लढणारच, मग तो अनिल देसाई वा महेंद्र देसाई वा आणखी कोणी देसाई असेल, असा ठाम निर्धार राष्ट्रवादी काँग्रेस पक्षाचे नेते आणि सातारा जिल्हा बँकेचे उपाध्यक्ष अनिल देसाई यांनी व्यक्त केला. ते दहिवडी येथे माध्यमांशी बोलत होते. देसाई हे मंत्री जयकुमार गोरे यांचे कट्टर विरोधक म्हणून ओळखले जातात.

अनिल देसाई म्हणाले, कुकुडवाड गटाचे आरक्षण खुले व्हावे अन् तिथून मी निवडणूक लढवावी यासाठी गेली वीस वर्षे मी वाट बघत होतो. त्यामुळे यंदा या गटातून राष्ट्रवादी काँग्रेस (अजित पवार) मधून देसाई आडनावाचा उमेदवार उभा राहणारच मग तो अनिल देसाई वा महेंद्र देसाई वा आणखी कोणी देसाई असेल. देसाई यांच्या या भूमिकेमुळे कुकुडवाड गटात तिरंगी लढत होणार हे जवळपास स्पष्ट झाले आहे.

कुकुडवाड एकमेव गट खुला :

माण तालुक्यातील पाचपैकी गोंदवले बुद्रुक हा गट अनुसूचित जाती महिला प्रवर्गासाठी आरक्षित झाला आहे. आंधळी, बिदाल आणि मार्डी हे गट सर्वसाधारण महिला प्रवर्गासाठी आरक्षित झाले आहेत. केवळ कुकुडवाड गट सर्वसाधारण प्रवर्गासाठी सुटला आहे, त्यामुळे या ठिकाणी मोठी चुरस पाहायला मिळणार आहे.

या गटात सातारा जिल्हा बॅंकेचे उपाध्यक्ष अनिल देसाई हे मातब्बर आहेत. त्यांनी नुकताच उपमुख्यमंत्री अजित पवार यांच्या उपस्थितीत राष्ट्रवादी काँग्रेसमध्ये प्रवेश केला आहे. ते कट्टर गोरे विरोधक म्हणून ओळखले जातात. दुसरीकडे, उद्योजक अभयसिंह जगताप हे राष्ट्रवादी काँग्रेस शरदचंद्र पवार पक्षाचे बडे नेते याच गटात आहेत.

पवारांच्या दोन चेल्यांशिवाय ग्रामविकास मंत्री जयकुमार गोरे हे ऐनवेळी भाजपकडून अरुण गोरे यांना निवडणुकीच्या मैदानात उतरवू शकतात. कुकुडवाडमधून देसाई आणि जगताप यांच्यासोबत अरुण गोरे यांनी निवडणूक लढविण्याचा निर्णय घेतल्यास इथे 'हाय व्होल्टेज ड्रामा' पाहायला मिळू शकतो.