संजय राऊत दिल्लीला निघण्यापूर्वीच 'ईडी'ने आपला डाव साधला!

मुंबई : संजय राऊत (Sanjay Raut) हे राज्यसभेचे सदस्य (खासदार MP) आहेत. सध्या संसदेचे पावसाळी अधिवेशन सुरू आहे. त्या अधिवेशनाला जाण्यासाठी खासदार संजय राऊत हे आज रात्री दिल्लीला (Delhi) जाणार होते. मात्र, त्या अगोदरच सक्तवसुली संचनालयाने (ईडीने ED) आज (ता. ३१ जुलै) सकाळीच राऊत यांच्या घरावर छापेमारी करत त्यांना दिल्लीला जाण्यापासून रोखत आपला डाव साधला. तब्बल नऊ तासांच्या चौकशीनंतर राऊत यांना ईडीने ताब्यात घेतले आहे. (MP Sanjay Raut was taking custady by ED for questioning)

दरम्यान, संजय राऊत यांचे निवासस्थान असलेल्या मैत्री बंगल्याबाहेर शिवसैनिकांनी मोठी गर्दी केली होती, त्यामुळे मुंबईतील राजकीय वातावरण चांगलेच तापले होते. सध्या चौकशीसाठी संजय राऊत यांना ईडी कार्यालयात नेण्यात आले आहे.

पत्राचाळ प्रकरणात ईडीने आतापर्यंत तीन वेळा खासदार राऊत यांना समन्स बजावले होते. पहिल्या समन्सला संजय राऊत यांनी उत्तर दिले होते. पण दुसऱ्या आणि तिसऱ्या समन्सला मात्र राऊत यांनी कुठल्याही प्रकारचे उत्तर दिलेले नव्हते. त्यामुळेच खासदार राऊत हे ईडीला चौकशीत सहकार्य करत नाहीत, असे ईडीच्या अधिकाऱ्यांचे म्हणणे होते.

दरम्यान, ईडीच्या तीन टीम संजय राऊतांच्या चौकशीसाठी आल्या होत्या. त्यातील एक गार्डन कोटच्या घरी, दुसरी मैत्री बंगल्यावर, तर तिसरी टिम राऊतांशी संबंधित लोकांकडे गेली होती. सकाळपासून तब्बल नऊ तास चौकशी केल्यानंतर संजय राऊत यांना घेऊन हे अधिकारी ईडीच्या कार्यालयात गेले आहेत, त्या ठिकाणी चौकशी करण्यात येऊन पुढील कार्यवाही होणार आहे.

तिसऱ्या समन्सनंतरही संजय राऊत हे ईडीच्या समोर जाण्याचे टाळत होते. सध्या संसदेचे पावसाळी अधिवेशन चालू आहे, त्यासाठी आज रात्री संजय राऊत हे दिल्लीला रवाना होणार होते. मात्र त्यांना दिल्लीला जाण्यापासून रोखण्यासाठी ईडीच्या अधिकाऱ्यांनी रविवारी सकाळची वेळ निवडली. संसदेच्या पावसाळी अधिवेशनाला हजर राहण्यासाठी रविवारी रात्रीच ते दिल्लीला रवाना होणार होते. म्हणून आज सकाळची वेळ ईडीने निवडली आणि संजय राऊतांना दिल्लीला जाण्यासाठी रोखले. मात्र, तत्पूर्वीच ईडीने रविवारी सकाळी भल्या पहाटे जात आपला डाव साधला.