पायलट यांनी हाय कमांडचा दरवाजा ठोठावला अन् मारले एकाच दगडात दोन पक्षी

नवी दिल्ली : राजस्थानचे (Rajasthan) मुख्यमंत्री अशोक गेहलोत (Ashok Gehlot) आणि सचिन पायलट (Sachin Pilot) यांच्यातील वादावर अखेर तोडगा निघाला आहे. काँग्रेस (Congress) हाय कमांडच्या भेटीसाठी पायलट आज दिल्लीत दाखल झाले होते. त्यांनी या भेटीत एकाच दगडात दोन पक्षी मारले आहेत.

पायलट यांनी आज दिल्लीत पक्षश्रेष्ठींची भेट घेतली. यानंतर वेगाने चक्रे फिरण्यास सुरवात झाली आहे. पक्षश्रेष्ठींनी गेहलोत यांना मंत्रिमंडळ विस्तारासाठी कानपिचक्या दिल्या आहेत. पायलट समर्थकांची मंत्रिमंडळात वर्णी लागणार असून, सरकारी महामंडळांमध्येही काही समर्थकांना स्थान दिले जाणार आहे. त्यांनी समर्थक आमदारांना मंत्रिमंडळासह महामंडळामध्येही झुकते माप मिळवून गेहलोत यांना शह दिला आहे. गेहलोत यासाठी सुरवातीला राजी नव्हते. अखेर पक्षश्रेष्ठींचा आदेश आल्यानंतर ते यासाठी राजी झाले असून, मंत्रिमंडळ विस्तार लवकरच होणार आहे, अशी माहिती सूत्रांनी दिली.

पायलट यांनी मंत्रिमंडळात समर्थक आमदारांना जास्त प्रतिनिधित्व मिळावे, अशी मागणी लावून धरली आहे. परंतु, मुख्यमंत्री अशोक गेहलोत यांचा याला विरोध आहे. राजस्थानध्ये मंत्रिमंडळात 30 पर्यंत मंत्री असू शकतात. सध्या मुख्यमंत्री गेहलोत यांच्यासह 21 मंत्री आहेत. सरकारमध्ये सध्या 9 मंत्रिपदे रिक्त आहेत. पायलट यांनी ही सर्व मंत्रिपदे समर्थकांसाठी मागितली आहेत. मात्र, मुख्यमंत्री अशोक गेहलोत यांनी याला नकार दिला होता. आता मंत्रिमंडळ विस्ताराच्या प्रस्तावावर दोन्ही नेत्यांची सहमती झाल्याचे समजते.

राज्यातील काँग्रेसमध्ये सुरू असलेल्या वादावर तोडगा काढण्याची प्रक्रिया आता अंतिम टप्प्यात आली आहे. मागील काही दिवसांपासून गेहलोत आणि पाललट गटामध्ये संघर्ष वाढला होता. सचिन पायलट यांनी केलेल्या मागण्यांवर वर्षभरानंतरही पक्षाने निर्णय न घेतल्याने ते नाराज आहेत. काही दिवसांपूर्वी काँग्रेस प्रभारी अज माकन यांनी गेहलोत यांच्यासह पायलट गटाचीही बैठक घेतली होती. पायलट समर्थकांना पक्ष संघटनेत आणि सरकारमध्ये स्थान देण्याबाबत या बैठकीत चर्चा झाली होती.