विजयसिंह मोहिते पाटलांच्या वक्तव्याने सोलापूर जिल्ह्याची इज्जत गेली  -उत्तमराव जानकर 

सोलापूर : महाराष्ट्राचे माजी उपमुखमंत्री विजयसिंह मोहिते पाटील यांचे 'मी राष्ट्रवादी मध्येच आहे,' हे वक्तव्य चांगलचं गाजले. त्याचा खरपूस समाचार त्यांचे पारंपरिक विरोधक व राष्ट्रवादी काँग्रेसचे पराभूत उमेदवार उत्तमराव जानकर यांनी  आज सोलापूरमध्ये पत्रकार परिषद घेऊन घेतला.

राज्यातील जेष्ठ नेते विजयसिंह मोहिते पाटलांनी मी राष्ट्रवादीतच आहे, असे वक्तव्य करून सोलापूर जिल्हा आणि माळशिरस तालुक्याची इज्जत घालवली, असा घणाघात उत्तमराव जानकरांनी केला आहे. 

विजयसिंह मोहिते पाटील यांचे चिरंजीव रणजित सिंह मोहिते पाटील हे भाजपात आहेत. त्यामुळे मोहिते पाटील घराण्यातच एकवाक्यता नाही, असे ते म्हणाले. दरम्यान मोहिते पाटलांनी सोलापूर तसेच बाजूच्या जिल्ह्यात ज्या उमेदवारांचा प्रचार केला त्यातला एकही उमेदवार निवडून आला नाही,  त्यामुळे येणाऱ्या काळात मोहिते पाटलांनी असे वक्तव्य करणे टाळावे, असेही जानकर म्हणाले.