MNS Vs CBSE Board : शिवजयंती दिवशीच 'सीबीएसई' बोर्डाचा संस्कृतचा पेपर; मनसे विद्यार्थी सेनेने दिला 'हा' इशारा...

Thane News : येत्या 19 फेब्रुवारी रोजी शिवजयंती असून, या दिवशी छत्रपती शिवरायांचा जन्मदिवस संपूर्ण जगात उत्साहाने साजरा केला जातो. तसेच शासकीय सुट्टी असतानासुद्धा 'सीबीएसई' बोर्डाने त्यांच्या वेळापत्रकात त्या दिवशी संस्कृत विषयाचा पेपर जाणीवपूर्वक नियोजित केला आहे. महाराष्ट्राच्या दैवताचा यातून अपमान केला जात आहे, असा आरोप महाराष्ट्र नवनिर्माण विद्यार्थी सेनेने केला.

त्यामुळे आक्रमक झालेल्या मनविसेनेने याबाबत मुख्यमंत्री एकनाथ शिंदे आणि शिक्षणमंत्री दीपक केसरकर यांच्याकडे तक्रारही केली आहे. त्यामध्ये त्या दिवशी होणारा पेपर रद्द करावा, अन्यथा महाराष्ट्र नवनिर्माण विद्यार्थी सेना त्या दिवशी परीक्षा होऊ देणार नाही, असा इशारा देण्यात आला असून, तत्काळ सीबीएसई बोर्डाच्या व्यवस्थापकांना पेपर रद्द करण्याचे आदेश द्यावेत, अशी मागणी करण्यात आली आहे.

मनविसेच्या तक्रारीकडे राज्य सरकार कसे बघते आणि काय निर्णय देते तेच पाहावे लागणार आहे. केंद्रीय माध्यमिक शिक्षण मंडळाच्या वतीने (सीबीएसई) बोर्डाची सेकेंड्री आणि सीनियर सेकेंड्रीची वार्षिक परीक्षा 15 फेब्रुवारी 2024 रोजी सुरू होत आहे, तर ही परीक्षा 2 एप्रिलपर्यंत चालणार आहे. परंतु 19 फेब्रुवारी रोजी शिवजयंती दिवशीच सीबीएसई बोर्डाने संस्कृत विषयाचा पेपर ठेवला आहे, अशी तक्रार काही पालकांनी मनसेकडे केली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

तर छत्रपती शिवाजी महाराज महाराष्ट्राचे आराध्य दैवत आहेत. महाराष्ट्र शासनाने अधिकृत सुट्टी जाहीर केली असताना सीबीएसई बोर्डाने राज्यातील शिक्षण विभागाशी समन्वय साधणे आवश्यक होते. शिवजयंतीच्या दिवशी विद्यार्थ्यांना महाराष्ट्राच्या गौरवशाली, पराक्रमी इतिहासाची माहिती दिली गेली पाहिजे. सर्व शाळांमध्ये शिवजयंती उत्साहात साजरी झाली पाहिजे.

मात्र, सीबीएसई बोर्ड महाराष्ट्राच्या दैवताचा जाणीवपूर्वक अपमान करत आहे, असा आरोप करण्यात आला आहे. दरम्यान, शिक्षण विभागाने 19 फेब्रुवारीचा संस्कृत विषयाचा पेपर रद्द न केल्यास महाराष्ट्र नवनिर्माण विद्यार्थी सेना या दिवशी परीक्षा होऊ देणार नाही, असा इशारा देण्यात आला असून, तत्काळ सीबीएसई बोर्डाच्या व्यवस्थापकांना परीक्षा रद्द करण्याचे आदेश द्यावेत, अशी मागणी मनविसेचे सरचिटणीस संदीप पाचंगे यांनी केली आहे.

(Edited by Amol Sutar)

R