Jitendra Awhad : बोरीवली - ठाणे रस्ता म्हणजे पैसे खाण्याचे कुरण; आव्हाडांचा सरकारवर गंभीर आरोप

Thane News : बोरीवली - ठाणे हा रस्ता म्हणजे फक्त पैसे खाण्याचे कुरण आहे. 'बाँड के बदले मे कॉन्ट्रॅक्ट', असा आरोप राष्ट्रवादी काँग्रेस शरदचंद्र पवार पक्षाचे आमदार डॉ. जितेंद्र आव्हाड यांनी ट्विटद्वारे केला आहे. जणू काही या रस्त्याला सोन्याचा मुलामाच लावणार आहेत, असेही त्यांनी नमूद करत त्या रस्त्याची चौकशी व्हायला हवी, अशी मागणीही केली आहे.

बोरीवली (Borivali) ते ठाणे हा डोंगराच्या आतून रस्ता काढण्याचे कॉन्ट्रॅक्ट मेघा इंजिनियरिंग या कंपनीला देण्यात आले आहे. तसेच त्या कॉन्ट्रॅक्टची किंमत 14 हजार 400 कोटी रुपयांची होती. त्या बदल्यात मेघा इंजिनियरिंगने 940 कोटी रुपयांचे इलेक्टोरल बाँड विकत घेतले. भ्रष्टाचाराचा हा सोपा मार्ग झाला आहे, असेही जितेंद्र आव्हाड (Jitendra Awhad) यांनी ट्विटमध्ये म्हटले आहे.

कॉन्ट्रॅक्ट घ्यायचे असेल तर बाँड विकत घ्या, हे सरळ गणित या सरकारने मांडल्याचा आरोप आव्हाडांनी केला आहे, तर बोरीवली ते ठाणे या रस्त्याच्या एका किलोमीटरची किंमत ही जगात कोणीही देत नसेल एवढी आहे. जणू काही या रस्त्याला सोन्याचा मुलामाच लावणार आहेत, असेही त्यांनी त्यांच्या ट्विटमध्ये म्हटले आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

बोरीवली ते ठाणे रस्त्याची जर चौकशी केली तर किलोमीटरमागे लावलेली किंमत आणि खरी किंमत यांच्यात प्रचंड तफावत आहे, हे स्पष्ट होईल. त्यासाठी त्यांनी 940 कोटी रुपयांचे इलेक्टोरल बाँड (Electoral Bond) खरेदी केले. म्हणजेच जवळपास कॉन्ट्रॅक्टच्या रकमेच्या दहा टक्के बाँड मेघा इंजिनियरिंगने विकत घेतले. या रस्त्याची चौकशी व्हायला हवी, असे नमूद करताना हा रस्ता म्हणजे फक्त पैसे खाण्याचे कुरण आहे. 'बाँड के बदले मे कॉन्ट्रॅक्ट' असेही शेवटी ते म्हटले आहे.

(Edited by Amol Sutar)

R