Police Officer Transfer: मनसेच्या मोर्चाला परवानगी नाकारणं भोवलं? मिरा-भाईंदर पोलीस आयुक्तांची बदली

Police Officer Transfer: ठाणे जिल्ह्यातील मिरा-भाईंदर शहरात निघालेल्या मराठी जनतेच्या मोर्चाला परवानगी नाकारणारे पोलीस आयुक्त मधुकर पांडे यांची बदली करण्यात आली आहे. मनसे आणि मराठी एकीकरण समितीनं काढलेल्या या मोर्चाला सुरुवातीला पोलिसांनी परवानगी नाकारली त्यानंतर शेकडो लोक रस्त्यावर उतल्यानंतर या मोर्चाची दडपशाही करण्याचा प्रयत्नही करण्यात आला होता. यामुळं मराठी लोकांमध्ये प्रचंड नाराजी पसरली होती. यापार्श्वभूमीवर सरकारनं घेतलेल्या या बदलीच्या निर्णयाची सध्या चर्चा सुरु आहे.

मंत्रालयातील सामान्य प्रशासन विभागानं आजच यासंदर्भातील बदलीचा आदेश काढला आहे. त्यांच्या जागी लाचलुचपत विभागाचे अपर पोलीस महासंचालक निकेत कौशिक यांची मिरा-भाईंदर आणि वसई-विरार पोलीस आयुक्तपदी नियुक्ती करण्यात आली आहे. तर या शहराचे पोलीस आयुक्त असलेले मधुकर पांडे यांची अपर पोलीस महासंचालक (प्रशासन) पदी नियुक्ती करण्यात आली आहे.