Bihar Election Result: बिहारच्या निकालात 'तीन' मुद्दे ठरले निर्णायक! SIR विरोधात रान पेटवणाऱ्या योगेंद्र यादवांची पहिली प्रतिक्रिया

Bihar Assembly Election 2025: बिहार विधानसभा निवडणुकीच्या निकालाचा कल आता जवळपास स्पष्ट झाला आहे. यामध्ये एनडीए २०० पेक्षा अधिक जागांवर आघाडीवर आहे. तर महागठबंधन २८ जागांवर आघाडीवर आहे. हा निकाल निराशाजनक असला तरी धक्कादायक नक्कीच नाही, अशी प्रतिक्रिया विचारवंत, राजकीय विश्लेषक आणि भारत जोडो अभियानाचे राष्ट्रीय संयोजक योगेंद्र यादव यांनी दिली आहे. दि वायरशी बोलताना त्यांनी बिहारच्या निवडणूक निकालावर पहिली प्रतिक्रिया दिली आहे. त्याचबरोबर या निकालाचं सविस्तर विश्लेषणही त्यांनी केलं आहे.

तीन मुद्द्यांत केलं निकालाचं विश्लेषण

१. एनडीए ही एक मोठी राजकीय आघाडी आहे (पक्षांच्या संख्येबाबत) तर महागठबंधन ही एक छोटी आघाडी आहे. चिराग पासवान आणि त्यांचा पक्ष लोक जनशक्ती पार्टी एनडीएमध्ये परतल्यामुळं एनडीए अधिक भक्कम बनली आणि त्यामुळं त्यांना पराभूत करणं महागठबंधनला कठीण बनलं.

२. सामाजिक तसंच जात आधारित पक्षांच्या आघाडीच्या बाबतीत, एनडीएकडं मतं मिळवण्यासाठी सामाजिक गटांचा मोठा समूह आहे. तर दुसरीकडं महागठबंधन केवळ मुस्लिम आणि यादव मतदारांवर अवलंबून होते. सर्वात महत्वाचं म्हणजे एनडीएचा मूळ आधार म्हणजे २० ते २२ टक्के ईबीसी मतं आहेत.

३. बिहारमधील महिला मतदार, ज्या कधीकधी कुटुंब किंवा जाती-आधारित युतींपेक्षा वेगळ्या पद्धतीनं मतदान करतात, त्या एनडीएकडे ओढल्या जातात. मुख्यमंत्री महिला रोजगार योजनेअंतर्गत महिलांना १०,००० रुपयांच्या प्रस्तावित देयकाने देखील याला बळकटी देण्यात मोठी भूमिका बजावली. कारण 'बिहारमध्ये १०,००० रुपये ही काही छोटी रक्कम नाही'.

एसआयआरचा परिणाम झाला?

एसआयआरचा या निकालावर किती परिणाम झाला? यावर भाष्य करताना योगेंद्र यादव म्हणाले की, या निवडणुकीत निवडणूक आयोगाची भूमिका दुर्लक्षित मानता येणार नाही. पण या निकालाचं सर्व श्रेय निवडणूक आयोगाला देणं ही एक राजकीय चूक असेल. विरोधकांनी तसं करू नये, त्याऐवजी विरोधी महागठबंधनं यादव-मुस्लिम युतीच्या पलीकडं आपला सामाजिक पाया भक्कम करण्यावर भर द्यावा तसंच याचं योग्य मुल्यमापन करावं.

भाजप युतीचा एनडीएवर काय परिणाम?

भाजप आणि एनडीएशी युतीचा जेडीयूवर काय परिणाम होऊ शकतो? यावर भाष्य करताना यादव म्हणाले, "नितीश कुमार यांच्या पक्षाचे रात्रीतून सत्तांतर होण्याची शक्यता कमी आहे. विशेषतः या निवडणुकांमध्ये त्यांची चांगली कामगिरी पाहता, सध्या त्यांची आघाडी चांगली आहे. परंतू जेडीयूची हळूहळू पिछेहाट सुरू झाली आहे. भाजपला पुन्हा एकदा नितीश यांना मुख्यमंत्री बनवण्यास भाग पाडलं गेलं तरी, एक मजबूत भाजपचा उपमुख्यमंत्री बसवला जाईल आणि जेडीयूचे नेते हळूहळू भाजपमध्ये सामील होतील.