Siddaramaiah: अखेर संकटमोचकासमोर सिद्धरामय्या झुकले! कर्नाटकात नव्या मुख्यमंत्र्यांच्या शपथविधीचा दिवस अन् वेळ ठरली

CM Shivkumar: कर्नाटकातील राजकीय घडमोडींना आता वेग आला असून राज्यात नेतृत्वबदल निश्चित झाला असून लवकरच नव्या मुख्यमंत्र्याच्या आणि मंत्रिमंडळाचा शपथविधी पार पडणार आहे. यासाठी काँग्रेसचे संकटमोचक डीके शिवकुमार यांच्या नावावर शिक्कामोर्तब झालं असून अखेर त्यांना काँग्रेसनं न्याय दिल्याची भावना राजकीय वर्तुळातून उमटत आहे.

महाराष्ट्रात महाविकास आघाडीच्या स्थापनेवेळी काँग्रेसनं संकटमोचक असलेल्या डी. के. शिवकुमार यांना महाराष्ट्रात पाठवून पेचप्रसंगात तोडगा काढण्याचा यशस्वी प्रयत्न केला होता. त्यानंतर कर्नाटकात झालेल्या विधानसभा निवडणुकीत भाजपची सत्ता खाली खेचून काँग्रेसला मोठा विजय मिळवून देण्यात त्यांचा महत्वाचा वाटा होता. त्यामुळंच निवडणुकीनंतर मुख्यमंत्रीपदासाठी डी. के. शिवकुमार यांच्याच नावाची चर्चा सर्वाधिक होती. पण राजकीय आणि सामाजिक गणितं सांभाळण्यासाठी पुन्हा एकदा सिद्धरामय्या यांना संधी देण्यात आली होती. त्यावेळी शिवकुमार यांचं नाव मागे पडल्यानं अनेकांनी नाराजीही व्यक्त केली होती. पण काँग्रेसनं आता योग्य वेळी योग्य निर्णय घेत कर्नाटकात नेतृत्वबदल घडवून आणत डी. के. शिवकुमार यांच्या गळ्यात मुख्यमंत्रीपदाची माळ टाकल्यानं या संकटमोचकाला न्याय दिल्याचं बोललं जात आहे.

मंत्रिमंडळाचा फॉर्म्युला काय?

कर्नाटकात मुख्यमंत्र्यासह ४ उपमुख्यमंत्री देखील असणार आहेत. यामध्ये या प्रमुख पाच पदांमध्ये जातीय समतोल साधण्याचा प्रयत्न काँग्रेसकडून केला जाणार आहे. त्यानुसार, मुख्यमंत्रीपदी लिंगायत समाजाचे डी. के. शिवकुमार हे मुख्यमंत्री होतील. तसंच इतर चार उपमुख्यमंत्र्यांमध्ये एक OBC, एक दलित, एक अल्पसंख्यांक समाजाचा असेल असा फॉर्म्युला तयार करण्यात आल्याचीही चर्चा आहे.

सिद्धरामय्या उद्या देणार राजीनामा

दरम्यान, सध्याचे मुख्यमंत्री सिद्धरामय्या हे उद्या आपल्या मुख्यमंत्रीपदाचा राजीनामा देणार आहेत. उद्या, गुरुवारी सकाळी ११ वाजण्याच्या सुमारास सिद्धरामय्या आपला राजीनामा राज्यपालांकडं सोपवतील. त्यासाठी २८ मे सकाळी ११ वाजताची राज्यपाल थावरचंद गेहलोत यांची अपॉईंटमेंट त्यांनी घेतली आहे. तत्पूर्वी सिद्धरामय्या संपूण मंत्रिमंडळासाठी आपल्या बंगळुरु येथील शासकीय निवासस्थानी ब्रेकफास्ट मिटिंग आयोजित करणार आहेत. काँग्रेसचे सरचिटणीस रणदीप सुरजेवाला हे देखील गुरुवारी बंगळुरुत दाखल होणार आहेत.