Sidharth Shinde Death: सुप्रीम कोर्टातील प्रसिद्ध विश्लेषक अ‍ॅड. सिद्धार्थ शिंदे यांचं निधन

Sidharth Shinde Death: सुप्रीम कोर्टात सुरु असलेली महाराष्ट्रातील सत्तासंघर्षावरील सुनावणी असोत किंवा शिवसेनेचं चिन्ह आणि पक्ष, आमदार अपात्रतेचं प्रकरण त्याचबरोबर स्थानिक स्वराज्य संस्थांच्या निवडणुकांबाबत सुरु असलेल्या घडामोडी असोत या सर्व विषयांचं मुद्देसूद आणि सोप्या भाषेत विश्लेषण करणारे सुप्रीम कोर्टाचे वरिष्ठ विधीज्ञ सिद्धार्थ शिंदे यांचं काल हृदविकाराच्या तीव्र झटक्यानं निधन झालं, ते ४८ वर्षांचे होते. त्यांच्या मागे पत्नी, मुलगा आणि मुलगी असा परिवार आहे. त्यांचं पार्थिव आज मंगळवारी दिल्लीतून विमानानं पुण्यात आणण्यात येणार आहे. पुण्यातील वैकुंठ स्मशानभूमीत त्यांच्यावर दुपारी १ वाजण्याच्या सुमारास अत्यंसस्कार केले जाणार आहेत.

कोण होते सिद्धार्थ शिंदे?

अॅड. सिद्धार्थ शिंदे हे सुप्रीम कोर्टातील एक मराठमोळे वकील होते. महाराष्ट्रातील मराठी माध्यमांना विशेषतः टीव्ही चॅनेल्सला सुप्रीम कोर्टातील महाराष्ट्रासंबंधिंच्या सुनावण्यांचं सोप्या भाषेत ते विश्लेषण सांगत असतं. जवळपास सर्वाच मराठी टीव्ही चॅनेल्ससाठी ते एक भरवशाचे आणि हक्काचे विश्लेषक होते. सुप्रीम कोर्टात सुनावणी सुरु असतानाच किंवा ती संपल्यानंतर बाहेर माध्यमांचे प्रतिनिधी त्यांना शोधत असायचे. कोर्टात नेमकी काय चर्चा झाली? कुठल्या महत्वाच्या मुद्द्यांवर युक्तीवाद पार पडले? यातील महत्वाची टिपणं काय आहेत? अशी इंत्यभूत माहिती ते मराठी प्रेक्षकांसाठी द्यायचे. कायम टीव्ही चॅनेलवर दिसत असल्यानं ते मराठी माणसांममध्ये सुपरिचित होते.

नेमकं काय घडलं?

अॅड. सिद्धार्थ शिंदे हे सोमवारी सकाळी नेहमीप्रमाणं सुप्रीम कोर्टात आपल्या कामानिमित्त गेले होते. यावेळी त्यांना चक्कर आल्यानं तातडीनं दिल्लीच्या एम्स रुग्णालयात उपचारांसाठी नेण्यात आलं. या ठिकाणी त्यांच्यावर उपचार सुरु होते, पण रात्री हृदयक्रिया बंद पडल्यानं त्यांचं निधन झालं. सुप्रीम कोर्टातील एक उत्तम विश्लेषक आणि जाणकार वकील आपल्या वयाच्या अवघ्या ४८ व्या वर्षी निधन झाल्यानं हळहळ व्यक्त केली जात आहे.

अॅड. सिद्धार्थ शिंदे हे मुळचे अहिल्यानगरच्या श्रीरामपूरचे असले तरी त्यांचं कुटुंब सध्या पुण्यात प्रभात रोड इथं वास्तव्याला आहे. तसंच सुप्रीम कोर्टात वकिली करत असल्यानं ते दिल्लीत राहायचे. महाराष्ट्राचे माजी कृषी राज्यमंत्री अण्णासाहेब शिंदे यांचे सिद्धार्थ शिंदे हे नातू होते. त्यामुळं राजकारणाशी त्यांची नाळ जुळलेली होती. तसंच वकिली व्यवसायात असल्यानं महाराष्ट्रातील राजकारणातील घडामोडींचं सुप्रीम कोर्टात सुरु असलेल्या सुनावण्यांवर ते प्राधान्यानं बोलत असतं.