Voter List News: मतदार यादीत नाव नसल्यास किंवा नोंदीमध्ये काही चूक असल्यास ती दुरुस्त करून घेण्यासाठी नागरिकांना आणखी वेळ मिळणार आहे. केंद्रीय निवडणूक आयोगाने दिल्लीसह महाराष्ट्र, हरियाणा, आंध्र प्रदेश, तेलंगणा आणि नागालँड या सहा राज्यांमध्ये सुरू असलेल्या मतदार यादीच्या विशेष सखोल पुनरीक्षण (SIR) कार्यक्रमाच्या वेळापत्रकात बदल केला आहे. या निर्णयामुळे नवीन मतदारांना नाव नोंदवण्याची, तसेच विद्यमान मतदारांना आवश्यक दुरुस्ती करण्याची संधी मिळाली आहे.
निवडणूक आयोगाने २९ ऑक्टोबर २०२६ रोजी जारी केलेल्या आदेशानुसार, संबंधित राज्यांतील दावे आणि हरकती दाखल करण्याच्या प्रक्रियेसाठी सुधारित वेळापत्रक निश्चित करण्यात आले आहे. मात्र, प्रत्येक राज्यासाठी ही मुदत वेगवेगळी असल्याने मतदारांनी आपल्या राज्याची अंतिम तारीख लक्षात घेणे आवश्यक आहे.
महाराष्ट्रातील मतदारांसाठी दावे आणि हरकती दाखल करण्याची मुदत वाढवून १३ नोव्हेंबर २०२६ करण्यात आली आहे. त्यानंतर २५ नोव्हेंबरपर्यंत या दावे आणि हरकतींचा निपटारा केला जाणार आहे. राज्याची अंतिम मतदार यादी ३० नोव्हेंबर २०२६ रोजी प्रसिद्ध होईल. त्यामुळे मतदार यादीत नाव समाविष्ट करायचे असल्यास किंवा नोंदीतील त्रुटी दूर करायच्या असल्यास नागरिकांनी निर्धारित मुदतीत प्रक्रिया पूर्ण करणे आवश्यक आहे.
दिल्लीमध्ये मतदार यादीसंदर्भातील दावे आणि हरकती सादर करण्याची अंतिम तारीख ३० ऑक्टोबरवरून वाढवून २५ नोव्हेंबर २०२६ करण्यात आली आहे. दाखल झालेल्या दावे आणि हरकतींची छाननी व निपटारा १५ डिसेंबरपर्यंत पूर्ण केला जाईल. त्यानंतर राजधानीतील अंतिम मतदार यादी २२ डिसेंबर २०२६ रोजी प्रसिद्ध केली जाणार आहे.
हरियाणा आणि आंध्र प्रदेश या दोन्ही राज्यांमध्ये दावे आणि हरकतींचा निपटारा करण्यासाठी २० नोव्हेंबर २०२६ ही सुधारित अंतिम तारीख निश्चित करण्यात आली आहे. या राज्यांतील अंतिम मतदार याद्या ३० नोव्हेंबर रोजी प्रसिद्ध होतील. या दोन्ही राज्यांसाठी पात्रता तारीख १ जुलै २०२६ निश्चित करण्यात आली आहे.
तेलंगणामध्ये दावे आणि हरकतींच्या निपटाऱ्याची मुदत २६ नोव्हेंबर २०२६ पर्यंत वाढवण्यात आली आहे. नागालँडमध्ये ही मुदत २५ नोव्हेंबरपर्यंत असेल. या दोन्ही राज्यांमध्येही अंतिम मतदार यादी ३० नोव्हेंबर २०२६ रोजी जाहीर केली जाणार आहे.
संबंधित राज्यांच्या मुख्य निवडणूक अधिकाऱ्यांनी केलेल्या शिफारशी आणि मतदारांची सोय लक्षात घेऊन आयोगाने वेळापत्रकात बदल केला आहे. पात्र नागरिकांना मतदार यादीत नाव नोंदवण्याची किंवा विद्यमान नोंदींमध्ये सुधारणा करण्याची पुरेशी संधी मिळावी, हा या निर्णयामागील उद्देश आहे.
आपल्या राज्यासाठी लागू असलेली अंतिम तारीख तपासून आवश्यक अर्ज, कागदपत्रे आणि दुरुस्तीची प्रक्रिया वेळेत पूर्ण करावी. अंतिम मतदार यादी प्रसिद्ध होण्यापूर्वी आपल्या नावाची नोंद योग्य असल्याची खात्री करणे महत्त्वाचे आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.