Ajit Pawar : अखेर मारहाण झालेल्या विजय घाडगेंना अजितदादांचा मोठा शब्द; मंगळवारी घेणार निर्णय

Pune News : राज्याचे कृषिमंत्री माणिकराव कोकाटे यांच्या राजीनामा घेण्यात यावा, अशी मागणी केली जात असतानाच आता मोठी बातमी समोर येत आहे. माणिकराव कोकाटे यांच्याबाबत उपमुख्यमंत्री अजित पवार येत्या मंगळवारपर्यंत निर्णय घेणार आहेत. छावा संघटनेचे विजय घाडगे यांनी शुक्रवारी दुपारी उपमुख्यमंत्री अजित पवार यांची भेट घेतली. या भेटीदरम्यान त्यांनी विजय घाडगे यांना शब्द दिला आहे.

छावा संघटनेचे प्रदेशाध्यक्ष विजय घाडगे यांनी पुण्यात राज्याचे उपमुख्यमंत्री अजित पवार (Ajit Pawar) यांची भेट घेतली. यावेळी त्यांनी घाडगे यांच्यासोबत सविस्तर चर्चा केली. त्यानंतर यावेळी भर बैठकीतूनच लातूरच्या एसपीना फोन केला. यावेळी त्यांनी घाडगे यांना करण्यात आलेल्या मारहाणीबद्दल 307 चा गुन्हा दाखल करण्याचे आदेश दिले आहेत. त्यासोबतच येत्या काळात सूरज चव्हाणला पुन्हा पक्षात घेणार नसल्याचे त्यांनी स्पष्ट केले.

त्यासोबतच सभागृहात रमी खेळणाऱ्या कृषीमंत्री माणिकराव कोकाटे यांचा राजीनामा घेण्यात यावा, अशी मागणी छावा संघटनेच्यावतीने करण्यात आली. या बाबतचा निर्णय मंगळवारपर्यंत घेतला जाईल, असे आश्वासन राज्याचे उपमुख्यमंत्री अजित पवार यांनी दिले.

दरम्यान, त्यासोबतच येत्या काळात सूरज चव्हाण यांना आता पुन्हा पक्षात घेतले जाणार नाही, असे अजित पवारांनी म्हटलं असल्याचे घाडगे यांनी सांगितले आहे. त्यामुळे आता या मारहाणीच्या प्रकरणामुळे सूरज चव्हाण यांची राजकीय कारकीर्द धोक्यात आली आहे.

दरम्यान, शुक्रवारी कृषी मंत्री माणिकराव कोकाटे यांचा जळगाव जिल्हा दौरा रद्द केला आहे. कोकाटे हे जळगाव जिल्ह्यातील चोपडा येथील अजित पवार यांच्या वाढदिवसानिमित्ताने आयोजित तीर्थ विठ्ठल, क्षेत्र विठ्ठल या कार्यक्रमाच्या निमित्ताने उपस्थित राहणार होते. मात्र, आयत्या वेळी कोणतेही कारण न देता ते जळगाव जिल्हा दौरा रद्द करून, नंदुरबारकडे रवाना झाल्याने,कार्यकर्त्यांचा आणि आयोजकांचा मात्र हिरमोड झाल्याचे पाहायला मिळाले आहे.